(AFP) – E brasa arma di Hamas a bisa diahuebs cu e ta keda comprometi na su acuerdo fragil di alto al fuego cu Israel, despues cu Donald Trump a bisa pueblo di Gaza cu nan lo ta “MORTO” su no libera e rehennan cu ainda ta secuestra eynan.
E prome fase di e tregua di seis siman a caduca den weekend, y negociacionnan riba futuro di e acuerdo a yega un impasse.
Hamas a bisa cu menasanan di Trump lo curasha Israel pa ignora e acuerdo, cu en gran parti a stop mas cu 15 luna di guera na Gaza entre Israel y Palestinonan.
Anteriormente, Trump a propone un plan ampliamente condena pa reloca Palestinonan for di Gaza, pa loke lidernan Arabe a reuni na Cairo e siman aki pa sostene un alternativa.
Un enviado di Merca a elogia Egipto ayera pa bin cu e plan nobo, pero no a sostene detaye di e alternativa proponi.
Advertencia di Trump a yega despues di revelacion di su administracion cu a tene combersacionnan directo sin precedente cu Hamas – categorisa como grupo “terorista” na Washington – enfoca riba rehennan Mericano na Gaza.
Oficina di prome minister Israeli, Benjamin Netanyahu a confirma cu a consulta cu Israel, y a bisa cu a “expresa su opinion” riba e negociacionnan.
“A pesar di tur intento di e enemigo pa evasion, mentira y decepcion… nos a preferi y ainda ta preferi pa tene na e acuerdo pa asina evita drama sanger di nos pueblo,” Abu Obaida, vocero pa Brigadanan Ezzedine al-Qassa, e brasa arma di Hamas, a bisa riba un video.
Diaranson, Trump a emiti loke el a yama un “ultimo advertencia” pa lidernan di Hamas, bisando e movemento pa libera inmediatamente tur rehen, “of cos a CABA pa boso.”
Israel a mata lider di Hamas, Yahya Sinwar como tambe lider militar di e movemento, Mohammed Deif durante e guera na Gaza, cu a cuminsa cu e atake di Hamas contra Israel dia 7 di october 2023.
Trump tambe a adverti di repercusionnan pa Gaza en su totalidad. “Na e pueblo di Gaza: Un futuro bunita ta warda boso, pero no si boso tene rehennan. Si boso hacie, boso ta MORTO! Haci un decision inteligente. Libera e rehennan awo, of ta bay tin fierno pa bay despues!”
E atake di Hamas a resulta den morto di 1,218 persona na Israel, mayoria di nan civil, mientras e represalia militar di Israel na Gaza a mata alrededor di 48,446 persona, segun cifranan di cada banda ta mustra.
Vocero di Hamas, Hazem Qasim a bisa cu palabranan di Trump ta pushando Israel pa ignora e terminonan di e tregua na vigor desde dia 19 di januari.
“E menasanan aki ta complica e asunto relaciona cu e acuerdo di alto al fuego, y ta curasha ocupacion pa evita implementacion di su terminonan,” Qasim a bisa, urgiendo Merca pa presiona Israel pa drenta e di dos fase di e acuerdo, cu ta envisiona como conduciendo na un tregua duradero.
E prome fase – negocia pa Merca, Qatar y Egipto – a trece un periodo di trankilidad relativo, durante cual a intercambia rehennan Israeli pa prisoneronan Palestino, y asistencia humanitario a drenta Gaza.
Israel, cu diadomingo a stop e fluho di asistencia, kier extende e fase inicial te mita di april.
Potret di Ahram Online ta mustra Abu Obaida, vocero di Brigadanan Ezzedine al-Qassa di Hamas.
