Brandweer tin pensa di spuit desinfectante riba sitionan publico

Tin paisnan cu ehecuta un campaña pa spuit cu desinfectante, nan sitionan publico pa trece un situacion di higiena contra e coronavirus/Covid-19. Na Aruba, departamento di Salubridad Publico (DVG), ainda no a pensa riba e posibilidad aki. Sinembargo tin iniciativa di brandweer pa haci’e.

Sharline Koolman di DVG a bisa cu nan no ta mira motibo mas pa e tipo di medida di higiena aki. El a argumenta cu nan no a pensa riba dje pa e mesun motibo cu shelter in place y toque de queda (TDQ) ta vigente ainda, y no tin aglomeracion di hende. “Es decir cu nos no wak esey como un problema aworaki,” el a bisa diaranson anochi.

Sinembargo el a informa cu cuerpo di bombero tin contacto cu cierto companianan y tambe cu Freewinds entre otro cu por yuda pa bin cu un accion di desinfecta cierto sitionan publico. “E parti di descontaminacion aki ta cay bao brandweer,” el a indica.