(AP) — Brad Pitt di Hollywood y musico Australiano, Nick Cave a haci nan debut como artista den un exhibicion na Finlandia, cu ta mustra escultura y ceramica crea pa e strea di pelicula y e cantautor.
E Museo Sara Hilden, ubica den e ciudad sur di Finlandia, Tampere, inicialmente tabata programa pa exhibi solamente e variedad amplio di obranan di artista Britanico, Thomas Houseago – conoci pa su esculturanan – pero e museo a convenc’e pa inclui obranan di su amigonan Pitt y Cave.
“Cave y Pitt ya ta reconoci den nan respectivo areanan di musica y cinema, pero esaki ta e prome biaha cu nan a exhibi nan arte – piesanan cu a wordo crea durante e transcurso di un dialogo andando cu Houseago”, e museo Finlandes a bisa.
Pitt y Cave a biaha na Tampere, un ciudad universitario conoci pa su cultura vibrante y escena musical, pa un evento di pre-apertura diasabra. Medionan di comunicacion Finlandes a reporta cu ambos homber a reconoce di ta emociona y nervioso pa presenta nan arte den publico pa prome biaha.
Entre e nuebe obranan den exhibicion di Pitt, di 58 aña, tin un structura den forma di un cas traha di silicon transparente y tira cu bala y un panel di plaster mustrando escena di un tiramento. Ta reporta cu Pitt a cuminsa traha arte di ceramica despues di su divorcio di Angelina Jolie na 2017.
Pitt a bisa e canal publico Finlandes, YLE, cu su obranan ta di “auto-reflexion”.
“E ta bay di, bo sa, unda mi a faya den mi relacionnan? Unda mi a haci eror? Unda mi ta complice?”, el a bisa. “El a nace di reconoce di loke mi ta yama un inventario radical di mi mes, pa bira realmente, brutalmente honesto cu mi mes, tuma responsabilidad pa esnan na ken mi por a haci daño y momentonan unda mi a djis faya”, e productor y actor Mericano, ganador di Oscar, a bisa YLE.
Cave, conoci pa su voz baritone scur como lider di su banda Nick Cave and the Bad Seeds, a produci un serie di figura di ceramica cu ta mustra e bida di diabel. El a diseña, pinta y glaze e 17 figura entre 2020 y e aña aki. “Mi tabata kier haci un diabel pasobra e ta cora, y mi gusta e color di glaze cora”, Cave a bisa YLE. “Eventualmente mi a dicidi pa haci e storia di bida di diabel mes.”
“Pa mi, personalmente, e ta papia den algo tocante e idea di pordon of e necesidad di wordo pordona. E ta un obra hopi personal pa mi.”
E exhibicion a habri diadomingo y ta continua te dia 15 di Januari, 2023.
