‘Bracelet Biña’

No ta tur dia bo por experiencia un evento cu tin como meta pa expresa solidaridad cu esunnan cu ta identifica cu un sexualidad of genero alternativo, specialmente na Aruba y menos na un scol cu ta identifica como Rooms-katholiek.

Como un persona cu ta considera su mes parti di e ‘G’ den LGBT y como escritor, mira e desaroyo di un Gender and Sexuality Alliance na mi ex scol Colegio Arubano tabata sumamente interesante. Aunke parce cu e desaroyonan ta bayendo di e manera con por spera di un organo burocratico, pa mi e ta un cambio positivo.

“Nada no ta den efecto tan universal y asina antiguo manera lo inhusto y lo absurdo. Contrariamente: ta e berdad y husticia cu den e desaroyo di sociedadnan humano ta menos universal y hoben. Locual ta splica tambe e fenomeno historico constante di e persecucionnan sin presedencia cual tabata y ta continua di ta e obheto di esunnan cu ta sclama pa esaki. Primariamente di parti di e mesun aglomeracionnan cu despues di tormenta nan, semper ta caba na adopta e ideanan cu a triunfa.” (red.-traduci) –Mikhail Bakunin, Dios y el Estado.

E comunidad di loke nan ta yama na otro paisnan como personanan LGBT rond mundo ta hayando mas y mas atencion, tanto negativo como positivo. Nos por mira e ultimo añanan cu mas y mas paisnan ta legalisando y permitiendo e fenomeno di personanan cu kier tin pareha di mesun sexo. Na otro banda di medaya pa personanan cu ta identifica como transgenero of otro genero no asigna ora nan a wordo naci hopi paisnan y legislacionnan no ta reconoce esaki. Esaki a te hasta toca Aruba cu e popular Amienda 7, cual tabata e base di e campaña pa partido politico Curpa.

Den mi wowonan como ciudadano henter e asunto aki na Aruba ta padece di loke mi gusta nombra manera e espectaculo di sociedad. Aunke e amienda aki a wordo introduci den parlamento, di loke mi por a mira no a bin mucho discusion den detaye di loke e cambio aki lo por nifica concretamente pa parehanan di mesun sexo. Mi a mira un influencia grandi di parti di religion riba e asunto aki, pasobra mas tanto e combersacion tabata trata si ta pasa e amienda den codigo civil como geregistreerd partnerschap of gay marriage. Semantica, ta loke e discusion aki kiermen pa mi. No tabata trata di por ehempel, con personanan cu tin seguro of pensioen no por beneficia di e institucionnan aki cu ta wordo garantisa den nos constitucion pa wordo otorga na tur hende sin discriminacion.

Un ehempel concreto tabata Maikel Kelly, ex propietario di Jimmy’s, kende a perde su pareha y mester a lidia cu tur e gastonan aki sin por a haya ningun ayudo di su difunto pareha su pensioen. Pero un otro ehempel cu por hiba mi netamente na e evento Purple Day cu mi a presencia siman pasa ta: con ta para cu hobennan cu ta identifica como LGBT? Con por percura cu nan no haya problema cu termento of posiblemente wordo disowned pa nan mayornan? Esaki claro no tin nada di haber cu e asunto di gay marriage pero e ta trata di e situacion cu hobennan ta enfrenta ora nan ta realisa nan identidad pero tin miedo di come out.

Loke a resalta di biaha ora mi a yega na mi ex scol tabata cu contrariamente na loke e evento di conscientisacion ta promociona, casi ningun docente ni studiante tabata bistiendo biña. Ma kere cu mi a plania fout. Pero mi mester a premira cu semper den asuntonan cu ta poco fragil lo tin un catch. Franticamente mi tabata busca pa cualkier persona cu lo ta bisti na biña. Poco desapunta mi a cana bay den direccion di Plaza pa Jos unda sigur lo tin trafico grandi di studiante durante nan pauze. Dilanti e borchi di scol mi a topa cu docente di matematica Hans van de Moosdijk, kende aparentemente ta un di e personanan cu ta lidera e iniciativa di e Gender and Sexuality Alliance na Colegio Arubano. Hans a splica mi cu pa via di e restriccionnan cu tin pa loke ta trata uniform na e scol e studiantenan no por a bisti biña. Pero enbes di esaki nan a parti bracelets biña cu nan a haya di un organisacion na Hulanda.

Di biaha manera un switch a cende den mi mente mi por a identifica tur e studiantenan cu tabata bistiendo e braceletnan biña. Pues no tabata trata di un movemento mediocre pa via di opresion burocratico, no! Den casi tur skina di e scol cu mi tabata mira tabatin grupo di hobennan cu a bisti e bracelet biña. Y no tabata simplemente un grupo di hende homber cu caracteristicanan tradicionalmente femenino ni hende muhe cu caracteristicanan masculino cu a acepta e braceletnan aki manera hopi hende ouderwets lo pensa. Un pluralidad di personanan: gaynan buchi te na chicknan fini, di acuerdo cu terminologia di mi tempo, cu entusiasmo a tuma a bracelets sin problema. Studiantenan cu mi a papia cu nan no solamente tabata expresa solidaridad pero activamente no tabata compronde dicon un persona no por simplemente expresa ken nan ta di manera habri. Te hasta esunnan sigur di nan heterosexualidad no tabata compronde e stigma contra nan amigonan LGBT.

Esaki ta e punto ora ta bira cla e diferencia y e division entre e mentalidadnan di e generacionnan. Hans a splica mi cu nan tabata contento cu e maneho di e scol a permiti nan pa aunke sea tene e evento, cu limitacion inclui. Mi ta compronde e punto di Hans, cu pa un isla den Caribe esaki ta un stap hopi progresivo. Claramente, e ta algo di elogia. Pero mi intuicion semper lo bay en contra un grupo chikito di hende cu kier dicta kico un grupo mas grandi tin di haci y con nan tin di haci esaki.

Mi por imagina cua lo ta e argumentonan contra un Purple Day of un Gender and Sexuality Network na un scol unda mayoria di studiante ta menor di edad: no mester stimula e studiantenan pa experimenta cu sexualidad pasobra nan ta mucho hoben pa esaki. Of no por tin algo asina pasobra e mayornan (cual por bin di e mesun mentalidad ouderwets aki) no lo permiti esaki. Pero segun mi a compronde e GSA simplemente ta boga pa tin mas conscientisacion y comprension disponibel pa grupo di hobennan LGBT. Nan ta haci esaki pa medio di por ehempel yuda e hoben durante e periodo dificil di coming out.

Esaki mi ta kere ta e punto mas importante, cual ta transcende tur otro argumento en contra: hobennan mester por sinti nan mes sigur sea na scol of na nan hogar. Hopi di e muchanan cu ta pasando den e proceso di coming out ta considera scol nan safe haven pasobra eynan nan tin aunke sea un poco mas libertad di expresa nan mes. Al contrario di e figura autoritario cu e mayornan ta representa, hobennan ta rondona di hende cu ta pensa similarmente na nan na scol. Y ta netamente na un luga asina cu mester tin ayudo pa nan.

Mi mesun experiencia na colegio, cual a bira asina cla despues di a bishita e scol ta refleha esaki. Mi tabata den proceso di coming out durante tempo di mi klas CB2-10. Claro, den e tempo ey no tabata existi algo asina manera e GSA, pero te hasta ora mi a enfrenta problema na scol pa via di actua mucho manera gay mi a sinti mi mes sigur pasobra mi klas mes a apoya mi. Ora cu un docente di natuur & wetenschappen a confronta mi dilanti henter klas y yama mi pa gay henter mi klas a bin na mi defensa. No tabata importa si ta e chick bunita, Claire, ni e gay cool, Christian. Tur a denuncia e docente pa su conducta in apropia. Te hasta e rector di ciclo basico ne tempo ey a bin na mi defensa.

Pues esaki mi ta kere ta loke ta importante, na luga di sconde e problema, trece na cla y trat’e y e asunto di religion manera mi a compronde di par di studiante cu mi a sinta combersa cu nan, ta central den e asunto aki. E ta importante pa separa iglesia y estado y e studiantenan mes a expresa esaki cu hopi elocuencia.