Productor di energia, BP a bisa ayera cu kier elimina of contraresta tur emision di carbon di su operacionnan y e azeta y gas cu ta bende na clientenan pa aña 2050, un meta ambicioso naci di presion pa yuda combati cambio climatico y sigui gana placa.
E metanan di BP, basa na London, ta inclui bira un emisor net zero den su propio produccion di energia, pero tambe reduci e dioxido di carbon crea pa su clientenan mientras nan ta usa e energia aki – e mayor cantidad di emision di e industria. Haciendo esaki lo rekeri no unicamente un cambio na fuentenan di energia mas limpi, sino tambe bin cu tecnologia nobo pa contraresta emision of extrae CO2 di atmosfera.
Como tal, anuncio di BP tabata menos un plan detaya di restructuracion y mas un declaracion di intencion di un compania cu ta intentando, manera industria di energia den su amplitud, pa sigura su viabilidad a largo plaso mientras mundo ta reduci su dependencia riba combustibel fossiel den un intento pa combati cambio climatico.
Den un presentacion na London pa cientificonan di clima, inversionista y periodistanan, CEO Bernard Looney a reconoce cu lo duna informacion mas specifico riba e metanan despues. El a compara e anuncio, cu ta yega apenas dos siman den su cargo como CEO, como e destinacion riba e GPS. “Nos ta cuminsando cu un destinacion”, el a bisa. “E detayenan lo bin despues.”
