Mediante un comunicado di Cuerpo Policial di diaranson ultimo, a informa cu den oranan di merdia nan a haya e notificacion di un boto cu supuestamente a ser bandona y tambe a haya jerrycan rond di dje.
Pa 12:30 central di polis a haya e notificacion door di personal di KIA cu nan lo a señala un boto na altura di Rincon.
Nan a informa cu nan a despacha e patruya di polis di biaha na e sitio y na unda ta bin haya berdad cu un boto como tambe jerrycan, nan tambe a sigura cu nan a haci un control rond di e area pero te cu e momento ey nan no a topa cu nada mas.
A pesar di tur loke a sucede na final di aña pasa unda varios persona a perde nan bida, no ta un secreto cu personanan indocumenta ta sigui prefera drenta di e manera aki cu tur e riesgo cu esaki ta representa.
Mientras tanto, minister di Husticia Rocco Tjon e mesun dia, a informa cu el a reuni cu contratistanan cu ta bay entrega un oferta pa e parti di construccion pa instalacion di e di cuater radar.
Igualmente ta señala cu Ministerio di Husticia y Asuntonan Social ta inverti hopi pa eleva siguridad na frontera di Aruba y p’esey ta logra intercepta lancha cu ta bin direccion di Aruba, sinembargo, esey no a sucede diaranson ultimo ni den otro oportunidadnan.
Fin di aña pasa e di cuater radar a yega Aruba y aworaki e parti di construccion lo bay inicia pa esaki por ser instala.
Mester menciona cu tambe e minister Tjon recientemente a splica cu pais Aruba no ta bay otorga ningun tipo di asilo na e personanan cu ta purba di drenta Aruba na un manera ilicito.
Minister Tjon ta pone enfasis riba cada ken cu tin e intencion pa drenta Aruba na un manera ilicito, pa por fabor no haci esaki, pasobra e persona ta bay sali perhudica. E ta un decision cu ta implica un riesgo halto y ta sumamente peligroso cu consecuencianan fatal, esnan cu ta logra drenta Aruba di e forma aki, ta bay ser deporta back sin oportunidad di asilo.
