Botica, laboratorio y specialistanan tambe lo haya condicionnan pa reduci gasto

Segun datonan cu AZV tin di aña 2019, nan ta wak ki posibel efectonan lo tin e cambionan cu nan lo tin planea pa implementa e aña aki na unda cu pa e aña ey segun Edwin Jacobs director di AZV a expresa, aseguradonan lo mester a duna un contribucion dependiendo di nan pakete.

Di esaki, el a trece dilanti cu comunidad mester ta consciente cu lo tin un grupo cu lo wordo afecta hopi pa loke ta trata contribucion propio, el a menciona cu pa esaki gobierno di Aruba ta trahando riba un plan di compensacion principalmente cu personanan cu tin cierto malesanan cu regularmente tin cu haci uso di laboratorio y botica, nan lo ricibi un compensacion di gobierno “pero esaki no ta un asunto cu ta regarda AZV unda cu te ainda nos no por duna informacion riba dje”, el a sigura.

Ademas, manera Bon Dia Aruba a informa den su edicion di ayera diamars, e introduccion di lista positivo di remedinan actual den cual tin 541 ingrediente activo, di esakinan 90 ta wordo saca for di e lista di e cual 51 por keda haya e remedi pero cu cierto condicionnan, specialmente personanan cu malesa cronico cu lo keda ricibi nan remedi segun loke Jacobs a afirma den un conferencia di prensa di dialuna ultimo.

El a papia por ehemplo di Omeprazol, Diazepam, Valium, entre otro, cu ta remedinan cu si un persona cu malesa cronico ta haci uso di dje e lo wordo cubri, si su uso ta pa un tempo cortico y no ta pa malesa cronico esey no lo wordo cubri.

Asina mes, el a conta cu tin 14 ingrediente activo cu no ta riba mercado mas y tin 25 ingrediente activo cu no ta wordo cubri mas, por ehemplo Paracetamol, Dika, Stropi, algun di nan por ser haya sin receta na e boticanan, el a specifica cu Paracetamol riba 500 milligram mester bay cu receta unda nan tin cu wak con boticanan ta bay cobra e aseguradonan e parti aki.

AZV ta cobra e gasto di e remedi mas e 18, 35 florin di recept regel pa cada receta cu AZV ta paga na nan pa e servicio unda cu Jacobs a expresa cu ta importante pa tin un bon comunicacion cu e dunadonan di cuido pa asina nan ta consciente di kico, ki ora y con nan tin cu prescribi y tambe pa cu e aseguradonan por ta consciente na ki momento nan ta bin na remarca pa e compensacion of pa e wordo cubri door di e pakete di AZV.

Jacobs a señala cu escogencianan mester wordo haci primordialmente a wordo dirigi pa evita limita acceso na servicio, pero si ta bay pidi un contribucion di e asegurado pa cu e servicio.

E ley pa cu esaki ta canando su caminda manera el a declara unda cu nan ta premira cu den e prome kwartaal e lo por wordo introduci y despues lo wordo implementa.

Pa e sector di cuido nan tambe ta bay pidi su contribucion pa reduccion di tarifanan di e dunadonan di cuido cu un 5.5% lo keda aplicabel den 2022, loke lo duna un contribucion di 19.3 miyon florin, conhuntamente cu e lista positivo di remedinan y contribucion propio di aseguradonan lo tin cu duna a base anual 12.5% cu den aña ki nan ta calcul’e na 10.4%.

Jacobs tambe a informa cu nan ta den dialogo cu boticanan pa loke ta trata orarionan den cual nan ta bay ta habri “nos ta kere cu tambe ta duna espacio pa nos por corta gasto”, igualmente cu specialistanan cu tin un presupuesto di mas di 653.000 florin pa aña lo wordo acerca pa reduci esaki y contractnan tambe cu specialistanan lo wordo revisa pa nan por mira kico por saca for di nan.

E dunado di cuido door di recorte den tarifa y presupuesto lo duna un contribucion di 19.3 miyon florin e aña aki, banda di dje nan tin algun servicionan caba cu a implementa cu ta draai unda cu nan ta duna su contribucion, entre otro radioterapia y operacionnan di wowo na ImSan.

Un di e puntonan cu lo haya hopi atencion e aña aki ta e cooperacion entre hospital Dr Horacio Oduber y ImSan unda cu nan ta kere cu tin espacio pa reduccion di gastonan di AZV door di e cooperacion entre e dos instituto aki, Jacobs a bisa cu e aña aki nan ta bay haci impulso di dje y tambe pone enfasis pa cu nan contribucion.

“Nos ta expect cu e dos instituto aki por duna un contribucion di 2.5 miyon florin na e reduccion di gastonan di AZV”, Jacobs a menciona.

Pa loke ta trata laboratorionan, Jacobs a informa cu e aña aki nan lo introduci un structura nobo di tarifa cu ta mas husto y realistico di loke tin na e momentonan aki, Jacobs a bisa cu nan ta aplica tarifanan di añanan 80 caminda cu testnan simpel di laboratorio ta wordo sobrepaga pa 3 of 4 biaha mas di lo cual e prijs lo mester ta aworaki.

“Den tempo tecnologia a percura pa cu gastonan baha pero e tarifanan nunca a wordo adapta na esaki, en cambio bo tin testnan caro cu door di e tarifanan akinan ta wordo paga di menos”, el a sigura.

Lo tin atencion riba e mandamento di cuido prome y despues di pashentnan cu a wordo manda afo, aworaki esey ta pasa regularmente cu pashentnan ta yega Colombia y no a wordo controla na Aruba, Jacobs tambe a señala cu pa clinicanan na Colombia nan lo bay na un destaho publico pa asina reduci gastonan y traha contractnan cu prijsnan mas accesibel.

Esaki ta forma parti di e plan di aña 2022 cu AZV tin ademas di esunnan cu a ser publica caba den edicion di Bon Dia Aruba di ayera cu AZV a trece dilanti pa nan por yega na reduccion di gastonan cu 60 miyon florin manera Hulanda a pone como condicion.

Di mesun manera, el a finalisa cu esaki ta un plan ‘ambicioso’ cu nan tin cu e potencial di 60 miyon florin na unda cu el a expresa cu nan no ta kere cu e aña aki nan lo yega na e cifra ey sino cu nan lo por logra alcansa 53.7 miyon florin so.