Federacion di trahadonan di Aruba (FTA) a firma un CAO cu Botica di Servicio Eagle. Segun FTA tabata spera pa hopi tempo pa yega na un CAO y a haci un esfuerso y dedica tempo pa yega na uno bon.
Hubert Dirks, presidente di FTA a bisa cu esaki ta e prome CAO pa trahado di botica di servicio. E ta kere cu esfuerso ta ‘bal la pena, pasobra awo tur trahado tin beneficio garantisa poni riba papel firma’.
Pa locual ta trata e beneficio primario y secundario ta regla. Awo tur trahado tin beneficio pa tin seguro di dentista y bril. E seguro ta specifica cada tanto tempo. “Nos ta kere cu esfuerso di director Lennert van der Poel, Rudy Geerman cu a negocia y otro persona cu haci e trabou hunto, a haci cu a logra yega na un CAO importante.”
Dirks ta splica loke ta compania Visser y awo Servicio, ta cay bou di e CAO, unda cu e salario ta bay dilanti, pero tambe e gratificacion di aña di servicio, bonus di Pasco, placa vakantie, areglo di spaar. E ta agrega cu tur esey ta importante.
FTA a contribui pa desaroyo y calidad di bida. Pa duna trankilidad na e grupo di trahado ‘den caso aki, Botica di Servicio’. E ta felicita pa e tremendo trabou y ta spera di tin bon relacion cu e compania.
Dirks ta splica si cu den caso cu CAO, sigur compania nobo na principio ta haya su mes den un posicion cu e dunando di trabou y sindicato ta contrario. Sinembargo e ta bisa cu mester busca e punto comun, pa motibo cu na momento cu e compania bay bon, e trahado por tin su beneficio; mescos cu na momento e trahado ta bay bon, e compania por produci mas. E ta bisa cu ambos hunto por yega na palabracion sin mester afecta niun dos partido.
Dirks ta bisa cu e parti financiero semper ta hunga un rol y ta keda dificil pa negociacion, ‘no ta facil’. No necesariamente cu e compania, pero e pais cu ta den situacion financiero y no tin un bista cla, por causa cu e compania ta cauteloso pa duna cualkier aumento.
“Nos a logra cu aumento. E tin su costo, mas cu ta dificil pero cu boluntad por yega na un bon acuerdo pa trahado. Pa un CAO wordo firma no ta dje facil, pa motibo cu e parti financiero ta keda dificil pa negocia”, Dirks ta expresa.
Dirks tambe a enfatisa cu costo di bida ta aumenta, anto ta spera cu e no bira mas halto pasobra esey lo trece un efecto negativo. E ta bisa cu ta consciente di e situacion cu tin y ta purba tur CAO den sector pa yega na un situacion di beneficio mutuo.
Un ehempel cu el a menciona ta den sector hotelero, caminda ultimo aña a mira cu a bira mas dificil. Sinembargo ta haciendo esfuerso pa trahado compronde compania y compania compronde trahado, unda cu ambos por sali beneficia.
Dirks a bisa cu e proximo congreso lo ta den november, unda nan lo bay trata e parti financiero. Nan kier contribucion di gobierno, unda nan kier tin un bista di e situacion di finanzas di pais Aruba y ki impacto por tin riba e poder di compra di e trahado.
“Ta spera cu inflacion por keda bou control y no tin efecto grandi riba gobierno mes. Pasobra mester mantene gasto necesario pa pais den infrastructura etc., pero tambe pa trahado, pa poder di compra y pa compania cu nan costo di haci negoshi”, Dirks a bisa.
E ta bisa cu sector turistico ta preocupa pa e gasto cu ta bin y cu mester pasa pa e consumidor. “Nos ta kere cu na cierto momento mester tuma e decision, pero percura pa nos no daña e producto turistico y tambe pa duna e producto cu e turista ta pagando p’e. Manera si e ta algo caro, pa e tin e mesun calidad di su prijs.”
Dirks ta bisa cu e preocupacion riba e CAO ta pa tur situacion di negociacion, caminda e por bira mas dificil pa prepara pa locual ta bay bin y ta spera cu tin comprondemento y por sinta na mesa pa dialogo sin ningun problema y sali afo di cualkier problema cu e pais por tin.
