Ta resulta cu na Hulanda ta surgi mas interogante tocante e refineria cu na Aruba mes. Un di e actornan den parlamento Hulandes cu ta masha activo den esaki ta parlamentario pa partido VVD, André Bosman. Hunto cun’e otronan tambe a pone un cantidad di pregunta dilanti ministro Plasterk, pa haya sa detaye di e deal cu Citgo. Realmente nan a haci un cantidad di pregunta cu aki na Aruba ni oposicion ta haci. Kico ta e motibo pa esaki? Miedo pa e electorado kere e partido den gobierno y condena tur cu tin pregunta critico pasobra ‘lo nan ta contra pa e refineria habri’? Anto no ta corda riba e parti (grandi) di e electorado cu no ta contra e reapertura riba su mes, y su eventual consecuencia positivo pa economia, pero tin duda serio riba e manera cu gobierno ta manehando e asunto aki? No ta ironico, pa no bisa ridiculo, cu desde Hulanda ta haciendo pregunta masha simpel tocante e proyecto biyonario aki, cu lo mester a bin dilanti den nos parlamento caba? No ta pasobra oposicion den parlamento tambe ta contento cu reapertura di e refineria, nan a bira sordo y ciego, pero mas cu tur cos mudo den e situacion actual? Unda e critica a keda cu gobierno no ta ni considera necesario pa bin parlamento di antemano, pero ta mantene tur cos den secreto te dia nan haya nan santo gana di informa parlamento di un ‘done deal’? Anto e ora nos ta haya un par di balente ta lanta para y cuminsa zundra? Lo ta hopi laat caba…
Por cierto Bosman no a haci pregunta al caso so, pero el a critica e situacion na Aruba tambe, unda el a bisa cu ta increibel cu ni sikiera e preguntanan al caso a ser haci na Aruba mes. Den e sentido ey e ta haciendo e trabao pa cual ta pagando oposicion den parlamento, cu ta sinta warda ‘bon mucha’ te dia cu gobierno haya ta bon pa informa parlamento. Mientras tanto a montona un cantidad di informacion cu ta contradeci loke gobierno ta bisa riba puntonan clave pa cu e proyecto. Nos ta ripiti algun di nan:
- Gobierno a duna impresion cu nan tabata negociando paralelo cu Valero, pa yega na un acuerdo tocante traspaso di e propiedad na Pais Aruba. Awor ta resulta cu no tin acuerdo y cu mester negocia ‘cu cuchiu na garganta’, pasobra gobierno ta para debil aki. Nan a compromete caba firmando acuerdo pa reapertura na e otro banda. Un mucha chikito por bisa bo cu esaki no ta manera di negocia. Si Valero no haya su gana, nan por stop di negocia y cumpli cu e contract cu Aruba, desmantelando e propiedad y dunando gobierno e terenonan despues. Kico ta e riesgonan pa Pais Aruba aki? Nos ta bay asumi tur responsabilidad ambiental?
- Citgo na Merca un dia despues di e acuerdo na Caracas a publica un comunicado di prensa, unda nan ta notifica di no ta participe den e acuerdo den e sentido cu nan no ta bay financia e proyecto. Nan unico participacion ta brinda asistencia tecnico y conseho. Esaki ta trece e pregunta grandi ta ken si ta bay financia e proyecto aki.
- Gobierno tabata crea e impresion cu e tuberia di gas tabata un ‘done deal’ tambe. Awor ta resulta cu awor no mas a firma un MOU cu gobierno Venezolano, cu no tin caminda di cay muri, pa bay explora e posibilidad. Tampoco ta motibo pa haci pregunta?
Sin duda algun, e accion di Bosman lo conta cu critica di hopi aki na Aruba. E tin su mes motibonan pa ta ‘preocupa’ pa Aruba, loke no semper ta bon noticia. Kico pensa por ehemplo di su ideanan pa cu un trato di ciudadano di segundo rango pa nos na Hulanda. Manera den e caso unda Bosman a bin cu un proyecto di ley pa frena yegada na Hulanda di hobennan di e islanan den Caribe, cu no tin tanto educacion y ta dificil pa nan crea un bon porvenir na Hulanda. Ta bon mes cu ni na Hulanda mes e ta haya sosten pa su ideanan exagera cu no ta soluciona nada. De paso si el a punta dede riba un fenomeno cu mester atencion urgente, tanto na Hulanda como riba e islanan mes. No ta pasobra e problema ta toca den su mayoria nos hermana isla Curaçao cu nos por djis cera wowo y haci manera e problema no ta existi. Nos tambe tin un problema creciente cu hobennan cu no a logra haya un bon educacion y ta un problema aki mes tambe.
Asina ta, nos por rechasa Bosman su posicion, pero nos debe e y nos mes un contesta riba e preguntanan cu el a haci. Ta berdaderamente increibel cu nos ta sinta warda manera un set di carne ki dia carnicero ta pasa, mientras cu den e situacion cu nos ta, cu cinco biyon di debe pa paga den e proximo decadanan, nos ta core conscientemente e riesgo cu nos ta bay añadi mas responsabilidad financiero na esaki.
