Josep Borrell, alto representante politico di Union Europeo, a contesta e critica fuerte cu el a haya despues di manda un delegacion tecnico Venezuela pa negocia cu gobierno di Maduro y oposicion e condicionnan pa un posible postergacion di eleccion y condicion pa oposicion participa, na su yegada siman pasa na Spaña.
Prensa: -Pakico a reconoce Guaidó y awor ta haci lo posible pa legalisa eleccion di Maduro?-
Borrell: “Ban yama e cosnan na nan nomber. Pa encargo di oposicion, mi ta den contacto cu gobierno di Maduro desde luna di juli pa mira si tin posible condicion cu ta permiti participacion di oposicion, loke lo tabata bon. No tabatin acuerdo. Maduro a pidi pa manda un mision di observacion electoral. Nos a bis’e cu pa esey nos tabatin mester cinco luna di trabao y constata cu lo tabatin condicion aceptable, loke no tabata e caso. Nos a negocia, y na dado momento mi a kere cu tabata oportuno manda algun experto pa sigui haci loke nos tabata haci directamente.”
-Y con Venezuela lo caba?-
“Na e momento aki, cos no ta bay bon. Gobierno Venezolano no kier retrasa e eleccion. E ta den su derecho, pero den e condicionnan nos no por manda un mision di observacion electoral. Esey lo haci cu no por organisa e eleccion cu un minimo di parametro democratico y e pais lo dal un paso mas den direccion di deterioro di institucion. Ta bay bira hopi dificil busca un salida pa e crisis.”
-Y no tin salida? Pasobra e poblacion ta sufri.-
“Esey ta loke ta preocupa mi. E situacion humanitario na Venezuela. E ta desesperante. E crisis humanitario mas grave cu un pais ta pasando aden, y comunidad internacional no ta presta demasiado atencion (…). Mi ta kere cu lo mester purba un dialogo politico. Nos a purba y e Noruegonan, pero sin resultado. Y naturlamente nos ta contra solucion militar.”
