Presidente di Asamblea Nacional, Julio Borges, a recorda cu gobierno mester confronta e dilema di paga e debe externo, o uza e recursonan aki pa combati e escasez di remedi y alimento.
Borges a adverti cu den e proximo oranan gobierno tin cu resolve e delicado dilema di con paga mas di US$3.500 miyon. “Un suma enorme pa Venezuela, o destina parti di e placa aki na compra di medicina y cuminda.” E ultimo fecha di pago riba bono lo ta dia 27 di october, pa gobierno no cay den default.
Tambe el a pidi gobierno pa habri e haf y aeropuertonan y pa permiti entrada di e ayudo humanitario, “ta un crimen cu e Venezolanonan ta coba den sushinan, mientras comunidad internacional ta dispuesto di yuda nos,” el a declara.
Borges a probecha e oportunidad pa anuncia cu un grupo di diputado di Asamblea Nacional (AN) y dirigente di Mesa di Unidad (MUD) lo bay na instancia internacional manera Nacionnan Uni, Unasur, Mercorsur, Grupo di Lima y Organisacion di Estadonan Americano, y ademas lo tin un encuentro priva cu presidente di Republica Dominicana, Danilo Medina, pa denuncia e Conseho Nacional Electoral, y resalta e importancia di cambia e sistema electoral na Venezuela pa cumpli cu derecho di pueblo di por eligi den eleccion liber, universal y secreto, y cu lo debolbe e pais e confiansa di voto.
