Un ciudadano a acerca Bon Dia pa comparti su disgusto riba e echo cu tin un borchi den LG. Smith Boulevard pa mas cu 20 aña caba ta dirigi turista den mal direccion anto hasta a yega di pone nan perde nan vuelo pa via di esaki. E persona ta comenta cu turistanan ta confundi riba e manera cu e borchinan ta buta aki na Aruba y con esaki ta coresponde cu e mapa di Aruba cu nan ta haya.
Un ciudadano cu ta prefera di keda anonimo pa motibo cu e no kier trapa riba ningun hende su pia, kier a djis trece pa dilanti e echo cu el a ripara cu riba e caminda di LG. Smith BLVD tin un borchi cu bo ta topa cun’e ora cu bo ta biniendo for di Noord pa bay Playa net na crusada di Valero cual ta dirigi bo den mal direccion. ”E borchi aki ta indica cu pa bo bay Downtown bo mester sigui stret y pa bo bay aeropuerto bo mester bira na man robes pero esaki ta fout pasobra ora bo bira na man robes, bo ta drenta e bario di Madiki” , e persona ta comenta. Segun e ciudadano ta splica Bon Dia, pa hopi di nos e ta dificil pa ripara e tipo di cosnan aki pasobra nos ta biba akinan y nos conoce e camindanan kiermen nos no ta wak e borchinan aki of casi nunca ta haci uzo di nan.
Al contrario, pa un turista cu no tin ningun idea na unda e ta bay, un eror asina ki ta confundi nan. E ciudadano su yiu muhe tambe ta bisa Bon Dia cu e ta haya masha lastima cu e borchi aki te ainda ta eynan y ningun hende no a ripara. ”Tin hopi hende cu a bisa mi di esaki y cu te hasta a yega di perde nan vuelo pa via di dje. Tambe locual mi ta ripara ta cu no tin borchi pa indica si bo a yega un caminda por ehempel ora bo bay “offroad”, hopi turista ta haya mapa pa nan por core rond di Aruba, pero ora cu nan yega nan destinacion hopi biaha nan no sa pasobra no tin borchi tampoco pa indica cu nan a yega pasobra tin borchi ta solamente na cierto partinan di Aruba so” , e persona ta bisa Bon Dia.
Kico esaki ta refleha?
Segun e ciudadano ta conta Bon Dia, e ta haya lastima cu ora su yiu muhe mester bin di afo pa vakantie cu su amigonan , tur ora e topico aki ta bini pa dilanti y nan mester corda cu ainda e borchi aki no a wordo cambia y otro tipo di cosnan asina ki cu ta refleha hopi riba con Aruba ta trata cu turismo. ” Un turista ta huur un auto, core rond di e isla, y riba e ultimo dia cu nan mester hiba e auto, nan ta core e risico di perde nan vuelo di locual hopi di nan a pasa a den caba pa via cu e borchi cu ta confundi nan. E manera cu tur esaki ta hinca den otro mi a scucha varios turista bisa cu e borchinan y mapa na Aruba ta confundi nan. Si esaki ta un isla turistico, mi ta haya cu e tipo di cosnan aki no ta aceptabel pasobra e ta refleha of haci manera cu Aruba no ta worry of no tin cos den ordo manera ta pretende” , e persona ta splica Bon Dia. Bon Dia a purba di comunica cu DOW pero no a logra ainda y ta spera di haya un declaracion di nan banda pronto pa locual ta e tema aki.
