Laga mi cuminsa na unda nos a caba nos ultimo articulo siman pasa. Minister Otmar Oduber ta keda hunga un wega di manipulacion, birando y trociendo tur sorto di berdad, desviando atencion, basta e logra su proposito. Nos a mustra tambe, cu e modus operandi di Otmar Oduber a pone un persona riba“social media” crea un “ismo” nobo, esta “Otmarismo”. Esaki ta e accion of capacidad di “manipula hende cu algo cu no ta existi den realidad, pa cambia of laga afo cierto hecho- of partinan di un storia of situacion, minando asina necesidad/grito pa transparencia y integridad.”

Nos a observa tambe cu minister Oduber ta uza un retorica pa hustifica su actonan, na un manera persuasivo, pa purba na convence pueblo,contradiciendo su mes y si mester recuriendo na mentira-, insulto-, acusacion- y insinuacionnan.

Den su reaccion riba mi persona, e biaha aki mal uzando su propio asina yama profesionalnan di su ministerio- of departamentonan, e ta bolbe mustra cu no ta importe con e ta mal informa pueblo, basta kere cu ta e ta e papiado di “e berdad”.

Mas leu, nos ta kere cu aki ta trata di un persona cu ta uza rasonamento falso contal hustifica su posicion. Den ciencia filosofico esaki ta wordo denomina como sofisma, na Hulandes sofisme of tambe drogredenen y Ingles fallacies.

Sofisma ta e arte cu e.o. un demagogo ta purba uza pa asina convence su audiencia. Door di no kier papia e berdad, un demagogo ta un persona cu no por bin cu argumentacion- y rasonamentonan racional pa hustifica su expresionnan falso. Asina aki minister Oduber ta purba di bin cu rasonamento cu ta zona mescos cu ta berdad, pero cu no ta e caso. Traves di e reaccionnan cu ta wordo treci sea pa e minister mes of uzando otronan, den e dianan aki nos lo refuta tur su tiradanan di mentira, cu argumento y pruebanan.

Den e reaccion di dia 31 di juli, traves di ministerio di ROIM, e ta bisa cu mi persona lo ta perdiendo conexion cu realidad y cu como ex mandatario mi lo ta mal informa pueblo, alegando cu como minister encarga cu medio ambiente mi lo no a logra resolve e problema serio di maneho di desperdicio riba nos isla, ni tampoco a logra un maneho duradero pa nos compania nacional Serlimar, di recogemento di sushi. Y como no si fuera poco e ta bolbe troce e berdad na momento cu e ta pone otronan bisa cu mi persona ta conoci pa e fayo di un planta di 30 miyon dollar, cu no a funciona. Pa cuminsa aki caba e ta purba pasa nos pueblo un 6 pa un 9. E ultimo aki no ta berdad. E planta a costa rond di 28 miyon florin y cu cobramento di interes pasobra su gobierno AVPOR no kier a paga, esaki lo por a yega 30 miyon florin, debi na interes cu mester a paga. Esaki por mira den un comunicado di su partido e tempo ey den DIARIO di 18 di april 2011!

No solamente e suma, pero mas bien e forma cu Otmar Oduber ta purba na hinca un rasonamento den pueblo, cu ta parce berdad, pero cu no ta asina. Uzando tacticanan di un demagogo, e kier pone pueblo kere cu ta e ta papia berdad.

Ora papia di maneho y funcionamento di e planta, mi kier a corda nos pueblo, cu ta desde december 2009, momento cu e gobierno nobo di AVPOR a sinta, e boycott a cuminsa contra di loke a wordo logra te na e momento cu Gabinete Oduber IV tabata sinta. A prefera di haci esaki, djis pa laga Serlimar Sui Generis “bloed dood”.

E maneho di desperdicio bou gabinetenan Oduber III y IV tabata dirigi riba stop e kimamento riba dump, loke a sosode entrante 1 di mei 2002. Esaki pa alivia e habitantenan. Tambe a cera e dumpnan na Vader Piet y Jaburibari. E ultimo aki a bira un parke di recreo. A bin cu e planta di Bouldin & Lawson, pa proceso sushi y baha e sero di sushi na Parkietenbos, creando asina fluff cu por a wordo uza pa cera e buraconan rond di Aruba, traha otro tipo di material y uza como fertilisante.

E planta aki a wordo inaugura 17 di juli 2009 y a funciona te na final di november 2009, na momento cu e boycott a cuminsa dor di Mike Eman, Mike de Meza, Benny Sevinger y no lubida Otmar Oduber himself, sin importa cu e pueblo di Parkietenbos y vecindario a bira victima.

Cu e planta a funciona nos por mira como resultado di e varios caso y sentencianan di hues, unda gobierno di AVPOR e tempo ey no por a demostra contrario. Si a wordo demostra cu e planta a wordo boicotia.

Den e Evaluation Report di B&L,traha y paga riba peticion di minister Oduber mes, a resulta cu e boycott no tabata solamente tira piesanan den e crusher, sino tambe destruccion di instalacion dor di corta kabelnan, horta koper, mescos cu partinan di hero. Mientras un generator grandi a disparce. E mesun rapport aki ta bisa tambe, cu pa un suma di 1.7 miyon dollar e planta por wordo poni bek den operacion. Pero e minister a prefera di scoge otro, esta comete kapitaalsvernietiging di 28 miyon florin y sigui pursigui e Wte-Sprookje, di 300 miyon dollar!

Den e sofismo cu Otmar Oduber ta biba aden, parcialmente e tin rason cu e planta no a funciona, pero e no kier acepta e berdad cu e y su gobierno AVPOR y su “full blown partners in crime” e tempo ey, a percura pa boicotia e planta y no lag’e funciona.