Booshi Wever(UPP): ‘Otmar cu practicanan mafioso di “hush-money” ta silencia contrincantenan pa privilegia sponsor?’

Dia 24 april 2019 UPP a bay pa lesa e documentonan tocante e destaho bou di man di december 2018. Nos a busca informacion riba e “incinerator chikito” pa kima sludge y nos a encontra entre otro documentonan encuanto e RioolWaterZuiveringsInstallatie (RWZI) cu tabata indica cu tin problema grandi cu mester wordo atendi cu urgencia. DOW a señala esaki y a trata na haya e 1.7 miyon florin cu tabata tin na FDA pa asina remedia parti di e situacion di e facilidad- y aparatonan di RWZI, cu segun DOW ta den un estado deplorabel. Pa colmo tur e facilidadnan di RWZI a surpasa nan capacidad grandemente y cu esaki obviamente ta forma un peliger extra.

Awor ta sali na cla, cu desde aña pasa caba, TNO a mustra riba e situacion deplorabel di e RWZI. Aparte di e peliger cu TNO ta señala, e procesamento y e tratamento di e awa di riool no ta optimal. Esaki tin como consecuencia cu e awa den Bubaliplas ta di un calidad super malo. For di e conclusionnan di e rapport di TNO por saca afo cu e murayanan na e planta di purificacion na Bubali ta den mal estado y ta deteriorando rapidamente. Un ora pa otro esakinan por kibra y si gobierno di POREDmep no actua rapidamente, esaki por tin consecuencia devastador pa nos turismo, nos medio ambiente y nos salubridad publico, pasobra tur e “overflow” di awa sushi, manera bisa den boca di pueblo awa di beerput, lo inunda gran parti di area di hotelnan y casnan eybanda.

Pues esaki lo por crea un problema grandi pa nos mesun pueblo pa loke ta Salubridad Publico, mientras pa nos economia esaki por ta devastador, mirando e efecto cu esaki lo tin riba nos turismo. Tambe e consecuencianan pa nos medio ambiente, particularmente nos beach y lama, lo ta grandi.

E “overflow” ta bin dor cu na varios sitio na Aruba, particularmente Oranjestad, tin varios pompnan cu ta mandando e awa sushi di riool pa e planta di purificacion na Bubali, cu lo sigui traha na momento cu e murayanan cay den otro. Pa evita un desaster ey banda, por opta pa para e pompnan, pero esaki na su turno lo crea otro problema den vooral Oranjestad, ora cu awa di e rioolnan bin halto y lo inunda varios sitionan. Cu otro palabra un MEGA-problema ecologico, economico y di salubridad publico.

DOW a adverti e minister, pero esaki no a “give a damn” ya cu e tabata prefera di fix contratonan lucrativo y miyonario pa su sponsor di campaña y di carnaval na prome luga na Serlimar(Seru Teishi) y awor sigui pa un otro contracto miyonario pa kima e.o. sludge na Parkietenbos. E Minister mester a deshaci prome di un otro compania cu ta atende cu kimamento di sludge na Parkietenbos.

Otmar Oduber a prefera di bay ataca Johnson’s Enterprises ferozmente bisando cu nan no por kima e sludge cu ta wordo treci for di RWZI manera cu ta wordo exigi. A pesar cu e compania a adverti riba e mal calidad di e sludge, e minister a keda demonisa e compania, pa asina desvia e atencion di su intencion pa privilegia su sponsor cu un contracto di mas di 15 miyon florin. Manera Otmar mes a declara, un incinerator chikito cu ya ta na Aruba caba, mientras cu nos Parlamento Dormilon ta permiti esaki.

Awor cu e berdad a wordo publica pa medio di e rapport di TNO y cu Johnson’s Enterprises a entama un Kort Geding, diripiente e minister ta draai 180 grado y ta bolbe purba di pinta un situacion comosifuera ta di aña pasa e ta bezig ta buscando solucion. Su supuesto opcion pa bende RWZI y haci esaki un NV tin como unico intencion pa bay presta mas placa riba mercado. Pues claramente aki e minister no a importe un bledo pa loke ta e problema cu a wordo señala y manera custumber el a “lap” esaki “aan zijn laarzen”, pasobra ta Otmar Oduber ta manda y ta “it’s his way or highway”.

Na momento cu Otmar no tin pia pa para ariba e ta sea intimida, chantagea, soborna of cumpra e silencio di su contrincante cu “Hush Money”. Por ta esey ta e motibo cu e Kort Geding a wordo para? Tin un acuerdo al respecto? UPP ta buscando informacion pero tin un silencio hermetico, ningun hende no kier comenta net net nada. Lo tin un “non-disclosure clausule” den e “omkoperij-deal “aki?? Si esey ta e caso, UPP ta di opinion cu ora cu ta toca placa di pueblo hamas por permiti pa den un “deal” tin un “non-disclosure clausule”, pa asina purba di evita pa pueblo haya sa kico e deal mafioso aki di “Hush-Money” aki ta encera!!!

“Whatever” ta su motibo, na final di cuenta ta pueblo lo mester bay paga toch. P’esey e parlamento di rubber cu ta den un soño profundo mester exigi documentonan pa sa cuanto y kico e “Hush-Money” aki ta encera pa cu e deal corupto di e incenirator chikito cu ta hole mas stinki cu awa di beerput cu ta bayendo RZWI.