Despues di basta luna cu mi a haci un denuncia na Minister Publico contra ex minister Otmar Oduber, e siman aki mi a ricibi un carta di Ministerio Publico, por cierto riba mi rappel di dia 10 di februari 2020, cu nan tin atencion pa e denuncia haci y cu nan lo notifica mi di desaroyonan den esaki.

Dia 2 di december 2019 mi a haci un denuncia di corupcion den e proyecto di incinerator chikito contra ex-minister O. Oduber. E ex-minister a nenga di duna e documentonan na prome instante, apesar cu e LOB ta duna cada ciudadano e derecho aki. UPP mester a acudi cerca LAR cu un caso y en total a tarda mas di 6 luna pa UPP por a haya e documentonan. Na momento di a studia e documentonan ya caba por a conclui cu tabata tin hopi cos cu a bay deliberadamente robes(sjoemel), pa asina por a privilegia sponsor di partido POR y na mes momento perhudicando nos pueblo cu otro proyecto miyonario. Pa colmo un incinerator cu ainda no ta den funcion.

E reaccion di Ministerio Publico a tarda, pero mi tin comprension pa e situacion di ultimo lunanan, esta di COVID-19, pero tambe e hecho cu Ministerio Publico falta di hende pa haci mas investigacion. Mi ta spera cu pronto lo mi por wordo informa cu tin un investigacion lo ta tumando luga ya cu e carta mes ta data di 20 februari 2020. Ban spera cu pronto tin accion di parti di Ministerio Publico, pasobra ya nos por a tende cu lo tin documentonan cu a disparce for di Serlimar cu ayudo di cierto trahadonan liga na ex-minister Oduber of cierto miembronan di RvT di Serlimar, pa asina evita cu ta trata na encrimina e ex-minister, e ex-director di Serlimar y alabes e miembronan di RvT. Por cierto awor nos por mira cu e Raad van Toezicht di Serlimar diripiente kier haci manera nunca nan no a kibra ningun copi y remarcabel ta cu hasta parce di tin e intencion di “dwaarsboom” e minister actual. Por ta cu asina lo kier evita pa mas cos sali na claridad di tur e corupcion na Serlimar y scapa pellejo di tanto ex-minister y ex-director y nan mes!!

No mester ta un sorpresa cu esnan envolvi den e maneho corupto di Serlimar ta haci todo por todo pa e berdad no sali na cla. Loke ta hopi remarcabel sinembargo ta e rol un biaha mas cu Parlamento y Gobierno den su totalidad ta hunga den e tragicomedia aki. Nan a parce di a guli nan lenga y ta ehecuta un palabracion hopi usa den e mundo mafioso cu ta OMERTA! Ni un solo grito pa un reunion publico pa discuti e berdad y realidadnan penoso cu ta saliendo di e situacion na Serlimar. No ta manera Premier a declara cu e caso di minister Marisol Lopez-Tromp ta un caso di partido POR. Alcontrario ta trata aki di un caso di falta di ehecuta un gobernacion drechi na unda cu no tin luga pa manipulacion y corupcion. E OMERTA pues no ta pa proteha e ex mandatario so, pero henter e ministerraad y parlamentarionan di e coalicion cu a permiti e bagamunderia tuma luga y awor mester keda “muisstil”. Ki berguensa!!

UPP ta spera cu minister Lopez-Tromp laga haci un investigacion forensico door un instancia imparcial y tambe laga Algemene Rekenkamer haci un investigacion mas profundo di Serlimar pa mira con a “wheel & deal” cu fondonan publico. Y pone cada un di esnan cu sea a comete of a permiti pa hopi fechoria tuma lugar na Serlimar responsabel! Ta un crimen contra e trahadornan y nos pueblo ta loke a ser cometi y mester aplica un otro ley di e mafiosonan:

“NO MERCY & NO FEAR”!!