Booshi Wever(UPP): ‘Kico “W2E” via un incinerator lo nifica pa e consumidor Arubano’

UPP for di aña pasa a publica caba kico e W2E via un incinerator lo bay costa e pueblo, pero parce cu un biaha mas “nobody cares”! Nos a yega di adverti di e proyecto corupto di HOH, e tempo ey tampoco niun hende no a “give a damn”. Wel awo nos tur por mira kico e resultado ta! Por ehempel no tin placa pa un aumento pa empleadonan, un edificio cu no ta adecuado, meerwerk etc. etc.

Wel cu e “Sprookje” di W2E di Otmar lo no ta diferente.

Nos a mustra cu rond di mundo tur tipo di tecnologia asina ta perdiendo plaza y varios di e plantanan aki ta wordo cera paso nan no ta asina “milieu-vriendelijk” manera ta ser propaganda. Pio ainda nan ta impagabel y si gobierno no subsidia, nan no tin bida y nan ta cera nan porta. Ningun compania ta keda hinca placa si nan ta perde placa. Ta p’esey no tabata tin ni un solo compania a bid finalmente pa e “Sprookje ” di Otmar.

A pesar cu e “bestek” tin masha poco informacion confiabel toch UPP a purba di traha un calculacion conservativo di kico e “Sprookje” aki lo bay nifica pa e humilde pueblo Arubano.

Den 4 tabel UPP lo purba, a base di informacionnan den e documento cu gobierno mes a produci y tambe di otro personanan, di ilustra kico e “Sprookje” aki lo nifica pa nos pueblo.

Tabel 1 ta ilustra cifranan actual y tarifa actual, loke ta den e “bestek”, y cu un W2E via un incinerator di 300 miyon florin! Pues cu un “tipping-fee” di 180,= florin y cu WEB cumprando un KWh na 13 cen, pueblo por mira cu e compania lo tin un perdida di 20.877.629,22 florin pa aña. Pues den e scenario aki logicamente ningun compania lo bid.

Den tabel 2, UPP a traha un scenario unda cu tin un “break-even-point”, pues cu lo no tin perdida ni ganashi. Den e scenario aki lo mester aumenta e “tipping-fee” cu 95 % haciendo esaki 350 florin pa ton. Y alabes mester bende WEB e coriente cu un aumento di 85 %, pues 24 cen. E aumento aki lo nifica un aumento drastico tanto di e tarifa di coriente, esun di Serlimar.

Den tabel 3, UPP a traha un scenario na unda cu e compania lo tin un ganashi minimo di 5.6 miyon florin pa aña, uzando un prijs pa KWh di 35 cen pa KWh. Esaki lo nifica un aumento super grandi di 169 % di aumento. Y WEB sigur lo pasa e aumento barbaro aki pa nos pueblo.

Den tabel 4, UPP ta laga e prijs pa coriente na 13 cen pero ta aumenta e “tipping-fee” cu 164 % y ta aumenta esaki di 180 florin pa ton na 475,= pa ton. Den e scenario aki e compania lo gana 5.6 miyon florin pa aña.

Den e ultimo dos scenario, UPP a sali for di un expectativa basta conservativo, esta cu e compania ta gana algo mas di 5 miyon florin. Un ganashi hopi marginal pa un inversion di 300 miyon florin, cu ta di un planta rond di 170 miyon dollar.

Algo hopi peculiar cu UPP a saca afo for di e documentonan, ta e hecho cu gobierno ta garantisa cu lo deposita 90.000 ton di desperdicio na e planta di W2E via incinerator! Sinembargo for di e rapport cu Ecogas a laga traha door di ARCADIS nos a saca afo cu e cantidad total di desperdicio cu Aruba ta produci ta solamente 67.000 ton. Di esaki ainda mester saca mas o menos 10.050 ton cu por ser “recycled of up-cycled”. Cu otro palabra pueblo di Aruba lo bay paga pa 33.050 ton(90.000 menos e 56950) na “tippiing-fee” cu Aruba no ta produci!

Pues e pueblo di Aruba lo bay regala un compania stranhero 33.0050 ton segun e scenario di tabel 4 (esun di 475 florin na tipping fee den un inversion di 300 miyon florin) un suma di awg. 15.698.750,=. Y si e cantidad no subi, ta nifica cu pa 20 aña lo mester paga un total di awg 313.975.000,=. Pueblo lo bira manera un Sinterklaas dor di paga pa un sushi cu e no ta produci.

Si no a duna e regaldo aki, e “tipping-fee” lo mester wordo aumenta cu por lo menos 316%, birando asina ey 750 florin pa ton. Aki un biaha mas nos ta tuma nota con Otmar ta keda manipula cu informacion y cu cifranan pa haci tur su esfuerso pa pusha su “Sprookje”.

Loke nos kier a ilustra cu e tabelnan aki ta, cu si mantene e “tipping-fee” na 180 florin manera e ta awor, ningun inversionista lo ta interesa den e proyecto aki. Na un “tipping-fee” di 475 florin, un aumento criminal di 164 %, e lo por saca su inversion cu un ganashi di 5.6 miyon florin pa aña basa riba un inversion di 300 miyon florin. Y esaki saliendo for di punta di bista cu den e 20 añanan nada lo pasa e instalacion. Nos tur sa cu esaki lo no ta e caso. Pues e gastonan lo ta mas, y consecuentemente e tarifanan lo conoce aumentonan mas grandi cu e calculacionnan conservativo cu UPP a mantene.

Cua loco lo bay haci inversionnan cu tanto incertidumbre, falta di transparencia etc. cu tin den henter e asunto aki?

Corda ningun di e companianan aki ta institutonan filantropico. Ta YMCA, Kiwanis of Lions ta institutonan no tin e fin pa gana placa, voor de rest cada un di e companianan lo kier gana placa y mucho mas cu 5.6 miyon florin so.

Nos ta spera cu esaki por ta mas visual kico e “SPROOKJE ” di O.O. lo nifica, esta un aumento drastico di tarifanan pa nos pueblo. Y esaki djis pa paga, pa sasia e locura di Otmar.

Un biaha mas, corda cu UPP a taha!!