UPP ta considera como un deber primordial pa keda vigila cualkier descuido y desviacion di e reglanan cu ta rigi den nos Estado di Derecho cu lo perhudica derechonan adkiri di nos pueblo y lo por ta motibo pa abuso e.o. e limitacion di e libertad di expresion, particularmente su ta trata aki un compania di estado.

Recientemente a yega na nos conocemento un maneho cu ta tumando luga na Tele-Aruba, bou direccion di Sr. Giovanni Kock y Sra. Rona Tromp, cu ta carece di tur tipo di obhetividad y parce mas bien tin como base principal pa complace cu e gobierno di turno. Cu otro palabra loke pueblo ta haya di Tele-Aruba ta loke ta cumbini e gobierno.

Prome cu 2017, bow di mesun director, nos planta “nacional” tabata de facto “Tele-AVP”. E denominacion aki tabata wordo usa dor di TUR partidonan politico aki na Aruba, tambe esunnan cu awor a forma gobierno. Ora cu nos a kere cu esaki lo ta pa pasado, UPP a bin ripara cu e la bira pio y a cambia di “Tele-AVP” pa “Tele-MEPORED”!

UPP a papia cu varios hendenan cu tin un programa sea cu nan mes ta cumpra ora of ta un produccion di “Tele-MEPORED” mes y nos conclusion ta cu no ta wordo permiti pa critica e gobierno POREDmep. Tele-Noticia a bira e “verlengstuk” di e PR di gobierno. E programacion como tambe contenido di Tele-Noticia awor mas cu nunca ta hopi obvio cu esaki ta wordo dirigi dor di Minister President cu ta metiendo den e noticiero, dunando instruccionnan directo na e directornan, ya cu e unico noticia cu ainda ta pasa ta di dje.

Loke ta e cherry riba e bolo ta loke a pasa cu e lider di UPP na november 2020. Pa ser exacto dia 3 di november 2020, e lider di UPP a wordo acerca pa e presentando di e programa “Na placa chiki”, pa ta un invitado den dicho programa pa papia riba e concepto di “Good Governance”. E presentando a haci un suplica pa no ataca, pero djis trece informacion kico ta nifica Good Governance y su importancia pa Aruba. Y esaki a sosode tambe. Tabata intencion pa graba mas programa e mesun dia. Sinembargo prome cu a bay over na grabacion di e siguiente programa, e presentando a disculpa su mes paso e la wordo yama. Ora cu e la bin back e la notifica e lider di UPP cu lo graba e otro programanan riba un otro dia. Riba 24 di november 2020 Sr. Groeneveld a notifica e lider di UPP cu e programa lo no pasa mas y cu mester tuma contacto cu Sr. Giovanni Kock pa haya un splicacion di e motibonan. Sr. Kock a informa cu ningun politico mag di bay den e programa. Riba un pregunta cu si e lider di UPP por papia riba p.e. di su organisacion di baseball, e la haya un contesta categorico: “NO”!! E lider di UPP a suplica e “director” pa pone loke e la bisa riba papel. Dia 16 di december 2020 y despues dia 14 di januari 2021 e lider di UPP a bolbe puntra esaki, pero te cu dia di awe, no a haya esaki por escrito.

UPP a duna e “director”, cu ta mas bien un mucha manda di gobierno, suficiente tempo pa manda splicacion riba papel di e motibonan cu no por pasa e programa. Nos ta insisti paso UPP a ripara cu den e mesun programa aki varios politico si a bin na palabra y participa. Ta tristo cu enbes cu nos planta nacional, particularmente den campaña, duna tur partido politico y/o organisacionnan e oportunidad di expresa sea nan deseonan, criticanan y inquietudnan, UPP ta constata net lo contrario. Tele-Aruba a bira un “verlengstuk” di gobierno of miho bisa un marioneta di gabinete Eveline Croes! Cu esaki UPP kier mustra cu nos planta nacional ta trapa e “Derecho di Expresion” di e.o. di UPP y ta haci e “Libertad di Prensa” un berdadero “WASSEN-NEUS”, cu e directornan cu ta simplemente “marionetanan” di gobierno!

“QUO VADIS”??UPP ta adverti nos pueblo pa keda vigilante y no permiti abuso di poder di e gobierno actual. Ta obvio cu e motibo principal pa e gobierno MEPORED acudi na limita nos derechonan constitucional ta, pa tapa e berguensa di a hiba un gobernacion sin pia y sin cabes cu a resulta den entrega di nos autonomia. Nos pueblo no por permiti cu e gobierno aki lo kier hiba un maneho antidemocratico y dictatorial na unda ta beneficia amigo, famia y sponsornan di campaña.