Ta conoci cu un horcan ta dal duro pa despues di a presenta un periodo di trankilidad, causa un desaster pio di loke e prome ola a ocasiona. Nos por considera e gobernacion di e ultimo 12 aña como e prome ola. E retiro di e gobierno Wever-Croes dia 30 di maart tabata necesario pa por duna e gobierno e oportunidad pa prepara pa e siguiente ola cu defecto ya caba a inicia cu e convenio firma cu Hulanda na unda a entrega nos autonomia y cu lo nifica cu mas medida lo ta na caminda. Un desaroyo cu e partido MEP cueste lo que cueste kier evita pa no perde mas credibilidad, legitimidad y principalmente voto en preparacion pa e siguiente eleccion.

E prome señal cu e coalicion tabata colga riba un hilo a bin na fin di 2020 ora partido MEP a duna inesperadamente inicio na campaña. Despues di esey e desacuerdo entre e partnernan a bira mas publico y frecuente. Riba dje e unico “logro” den 4 aña di e gobierno di sra. Wever-Croes, esta entrega di nos autonomia, tabata colga manera un bloki na pia di e gobierno. A warda riba e momento oportuno pa entrega retiro di e gobierno cu e intencion macabro pa mata “twee vliegen in één klap”. Na prome lugar tira culpa riba otro partnernan den coalicion, loke ta lanta e pregunta con lo por confia MEP ora mester negocia pa un siguiente gobierno? Na di dos lugar parce cu sra. Wever-Croes a opta pa hinca partidonan cu lo kier participa den e siguiente eleccion den un preta. A adelanta e fecha di eleccion cu e proposito entre otro pa reduci e tempo pa otro partidonan politico por prepara debidamente.

Sra. Wever-Croes a haya e fama di no ta ria pa usa mentira of manera Rutte a hasi na Hulanda, sconde tras di un memoria selectivo. Ta corda unicamente loke ta cumbini su persona y partido. P’esey no ta nada straño cu masha poco hende a kere e motibo expresa pa sra. Wever-Croes pa baha su gobierno. E excusa “integridad” a wordo masha liher desenmascara. Antilliaans Dagblad a dal e clabo riba su cabes ora a mustra con sra. Wever-Croes a deha di introduci reglanan di bon gobernacion y na diferente ocacion a prefera di ignora integridad den su gobernacion. Na prome lugar a tolera e bagamuderianan cu tabata tumando lugar na Serlimar. Gobierno den su totalidad y Parlamentarionan di MEP a scoge pa haci manera nan nanishi ta sangra y a ignora tur documentonan cu UPP a comparti cu nan. Partido RED, cu tambe constantemente ta grita cu ta nan ta tata y mama di e concepto di Bon Gobernacion, tabata asina preocupa pa e aspecto di Canabis, cu nan a practica “Cani(bis) mi pa mi Cani(bis) bo” y laga tur esaki pasa.

Loke sin embargo ta inconcevibel ta e forma con e gobierno a trata na hinca e asunto di Serlimar den “doofpot” y ora nan esfuersonan a fracasa pasobra e remplasante di e ex-minister a disidi pa para firme pa integridad. Sra. Wever-Croes y Parlamento comprometi a prefera di acudi na “valsheid in geschrifte” y alabes purba na splica asuntonan procedural di Parlamento cu no ta berdad, enbes di tambe para pa integridad. Pa colmo riba wall di e Presidente di Parlamento nos por a tuma nota con su persona ta indica cu den politica bo mester tin e mentalidad corecto y no uno corupto, manipulativo, dictatorial y mentiroso ya cu esaki ta hiba e pais na desgracia y abuso di pueblo. Esaki ta net locual cu e mesun persona aki a practica aña pasa na oktober ora a trapa riba nos constitucion pa core cu un minister.

Pues historia y realidad politico ta mustra cu e siguiente ola di e horcan ainda lo mester bay sacudi nos isla y enbes di acudi na ta honesto y transparente cu nos pueblo, atrobe tin tur indicacion cu promesanan falso, atakenan personal y un falta di integridad lo bay ta e modus operandi di e partidonan geel y berde. Aruba ta para dilanti decisionnan importante cu lamentablemente ta necesario. UPP no lo hala pa su responsabilidad y ta dispuesto pa participa den un gobernacion cu mester compromete su mes na introduci di inmediato reglanan di bon gobernacion!