Na momento cu e pandemia a presenta su mes, hopi a wordo papia, hasta propaganda cu e “Normal Nobo”. Un aña pasa pueblo tabata wordo bisa pa prepara p’esaki y cu na 2021 esaki lo mester cuminsa haya forma.

Un normal nobo cu tabata inclui un speransa pa un cambio pa mihor pa un y tur. Sinembargo e “normal nobo” tabata nada mas cu un fata morgana. Mientras cu tabata kier pa tur hende cambia, nos gobierno y nos Parlamento a keda cu e mesun racha di manipulacion, abuso di poder, nepotismo, etc. Pues “business as usual”.

Mientras cu un eleccion ta representa un momento pa un cambio real, y cu partidonan chikito a haya sosten, nos por mira cu nada a cambia, cu excepcion e caranan. Pa colmo, prome cu a forma e gobierno nobo, e presupuesto 2021 a haya un sosten di mayoria, implicando cu a bay di acuerdo cu e maneho di POREDmep, cu den campaña a critica ferozmente. Esaki a bay pareu cu e racha di “Golden Handshakes”, mas nombracion di “friends & family”, firmamento di contractonan multi- miyonario, sin pueblo sa e contenido (ainda)! Pakico? Pa atrobe privilegia compinchi di un banda? Y di otro pa sigui sinta den stoel di sea minister of parlamentario?

Otro indignacion cerca nos pueblo ta e maneho pa cu COVID. Ken tin e culpa diripiente cu e casonan a aumenta drasticamente? E medidanan draconico cu gobierno a presenta ta dirigi na e pueblo so!

Tin hende ta pensa cu semper nos di UPP tin algo contra of critica, sea cu algo ta bon, malo of robes! UPP desde su principio a haci esaki y lo sigui haci esaki. Pero di otro banda nos lo sostene tambe si algo ta bon. Esaki nos a haci na 2020 ora cu gobierno a cu su medidanan pa contene e pandemia cu a presenta. Pero ora cos a bay robes, nos UPP a hala atencion tambe!

Nos a bisa, cu den e maneho di e pandemia no tin lugar pa heroe, mirando cu diferente minister tabata purba briya na momento cu cosnan tabata bou control. Tabata tin elogio p’aki y p’aya. Pero a hunga heroe ora resultado ta bon. Pero ora cos sali for di man, ta culpa e pueblo. Pero e problema principal ta, cu esnan cu ta responsabel, no a ni ta carga nan responsabilidad. No tin ni tabata tin “DAADKRACHT”. Nos por mira esaki ultimamente, ora ta presenta medidanan despues di a duna oportunidad di sigui pachanga y bochincha!

Pasobra realidad ta, cu Prome Ministro, Minister di Salubridad, hunto cu nan “expertonan” por tabata sa cu SIN MAN DURO, pa TUR, pero TUR hende, nos lo sinti e consecuencia, manera atrobe ta e caso!! MAN DURO riba cumplimento di ley- y reglanan, pero tambe den ehecucion di algo asina sensible di loke ta vacunacion y test! No por pone KEN CU TA haci e trabou discreto aki, djis pasobra ta amigo of campañador. Y djey purba scapa cu, “pero no ta ambtenaar nan ta.”!

Articulo ta continua riba pagina 19.