Diaranson 19 di augustus representante di gobierno Hulanda sr. Arkebout a haci un declaracion cu sigur ta lanta mas pregunta rond di e deliberacion cu lo ta tumando lugar entre Aruba y sr. Knops.

UPP ta haya mas y mas e impresion cu deliberadamente ta scoge pa no papia e berdad y cu tanto Premier Wever-Croes como e miembronan di Parlamento Thijsen y Tjon ta prefera di orkestra un comedia pa tapa e amargo berdad di “entreguismo” of “traicion”! Un comedia cu al final lo costa nos pueblo y nos pais nos derecho di autodeterminacion.

Arkebout den su entrevista kier mustra con “bon Samaritano” Hulanda ta, y cu desde comienzo di e pandemia, nan a percura pa yuda Aruba cu pakete di cuminda, cubri likidez di gobierno, yuda cu cuerpo medico y tambe aparatonan medico. Pero tambe e ta mustra cu awor ta warda riba e “OK” di Aruba pa asina cu “plezier” sigui yuda Aruba. E “OK” cu e ta referi na dje ta trata di e “landenpakket”, R(A)FT y e CHE/OHH, mara den un “consensusrijkswet” cu Aruba mester acepta. Na final sr. Arkebout ta indica cu “afspraak” ta “afspraak” y cu na un manera “zakelijk” Hulanda kier CABA di deal cu Aruba,. Segun sr. Arkebout esaki lo no dura mucho mas, pasobra Aruba tin urgencia pa haya placa. Nos ora ZERO!!

UPP ta considera e actitud Hulandes como sadista. Memey di e crisis di un pandemia cu tin nos pueblo den un “nekklem”, Hulanda kier bin pretende cu ta cu “plezier” nan kier yuda nos. Y ora ta papia di “afspraak”, UPP kier refresca memoria di sr. Arkebout cu Statuut tambe tin e “afspraak” cu lo duna sosten na otro. Cu na Aruba cosnan mester cambia ta un hecho. Pero historia lo mustra cu pa Hulanda “afspraak” parce no ta conta. Un ehempel recien ta esun cu Hulanda no ta haya necesario pa cumpli cu palabracion haci durante e encuentro entre ministernan di Husticia di e partnernan di Reino, manera minister Bikker a señala. Na final e manera “zakelijk” cu Hulanda kier anda cu Aruba, ta mustra mas den direccion cu e entidad Caribense, lo ta un instancia colonial Hulandes, esta “West Indische Compagnie III”.

Loke a yama atencion di UPP ta e declaracion cu tin palabracionnan haci y a acentua cu “afspraak is afspraak”. Pregunta: cu kende y ki sorto di “afspraak” Hulanda tin? E “afspraak” haci riba 10 di juli na Den Haag? Kico atrobe NO ta wordo divulga? Lo ta berdad cu tin palabracionnan cu nos Prome Minister pa asina haya tempo pa busca y haya sosten na Aruba pa loke ya a keda palabra(draagvlak)? P’esey nos ta tende Minister Presidente bisa constantemente cu pa 80% e condicionnan Hulandes ta cuadra cu loke Aruba tambe kier? UPP ta kere cu ta tempo pa Prome Minister ta sincero cu nos pueblo y splica kico ta e palabracionnan cu tin cu Hulanda y cual ta e condicionnan cu e ta referi na dje cu e of gobierno a bay di acuerdo cune SIN mishi cu nos autonomia y ki “afspraak” tin cu SI ta mishi cu nos autonomia?

Desde juli nos por tende gobierno papia di e condicionnan y e Leynan di Consenso. Cada bes ta bin bisa nos cu nos tin rosea ainda pa algun tempo, pero cu esaki no ta pa largo. Pa duna credibilidad na e COMEDIA aki, gobierno ta haciendo su maximo esfuerso pa yega na un palabracion satisfactorio tambe pa Aruba, a organisa un “Cumbre di Informacion” di 12 di augustus y despues un reunion cu Parlamento cu pa colmo a keda na mita. Durante e encuentronan a bolbe sali sinembargo afor cu nos tin ‘rosea” te cu 11 di september.(ORA ZERO)! Remarcabel ta cu cada bes ta anuncia esaki manera un tremendo logro, mientras cu nos ta comprende for di e representacion Hulandes y tambe e Secretario di Estado Knops, cu NO tin negociacion pero simplemente “gesprekken” y cu ta algun cambio chikito so tin. Kico realmente ta warda cune? Y den esaki nos Parlamento tambe ta hunga un rol dudoso, particularmente e Parlamentarionan Thijsen y Tjon. Nan kier mustra di ta para duro pa nos autonomia y nos derecho di autodeterminacion, pero no ta mustra cu tin accionnan ta wordo tuma al respecto.

Corsou A haci un peticion na Raad van Advies pa conseho encuanto e proceso di un Ley di Consenso. Prome-Minister di Aruba na prome instancia a declara cu esaki NO ta posibel na Aruba, pasobra e no ta para den nos leynan. Nos por a tuma nota sinembargo di un articulo publica den Bon Dia Aruba dia 20 di augustus na unda Prome Minister a haci un peticion dia 16 di juli y a ricibi contesta dia 24 di juli di Raad van Advies. E conseho ta devastador pa nos constitucion, ya cu parlamento ta wordo completamente hala un banda y ta CORONA gobierno como e instituto mas halto di nos Estado di Derecho, pasobra gobierno por cera un deal riba e Leynan di Consenso SIN aprobacion di Parlamento. Un prueba contundente cu ya caba tin un deal y cu mester cumpli cu Hulanda cueste lo que cueste. Y cu e Parlamento “NOBO” oficialmente a wordo degrada pa un “STEMPELPARLEMENT “!!

Awor e palabra ta pa Parlamento defini si lo acepta e rol di “STEMPELPARLEMENT” of lo lanta for di soño, yama un Reunion Publico y fiha un posicion pa cu nos derecho inaleanabel di autodeterminacion y autonomia. UPP lo urgi parlamentarionan pa forma un delegacion pa bay Hulanda y atende esaki cu nan coleganan Hulandes y tambe cu gobierno Hulandes. Pasobra for di gobierno mes nos no por ningun iniciativa mas pa esaki, mirando cu “afspraak is afspraak”.

Nos derecho di autodeterminacion ta INALIENABEL, ta exclusivamente di e pueblo Arubano y ningun gobierno por torno na dje.

#accionpaliberaaruba