ORANJESTAD – Apenas cu 100 dia di gobernacion a transcuri, UPP a denuncia aña pasa e modus operandi di Otmar encuanto su forma di fix dealnan fabuloso pa miembronan di su Cartelnan. Lamentablemente tur esaki cu colaboracion di directornan y miembronan di conseho di supervision. Cada bes parce cu “nobody cares”!! Mientras e Parlamento, cu ta gaba cu nan ta otro y critico, den su totalidad ta apoya e practicanan obscuro aki.
Di aña pasa nos a mustra riba e fix-bidding cu a tuma luga pa cu e leasemento di e trucknan, cu no tabata necesario ni urgente. Despues tabata e fixmento di huur di edificio di un di su sponsornan na Pos Chikito. Anto na un prijs barbaro y tampoco tabata necesario ni urgente.
Aña pasa nos a denuncia tambe otorgamento di contractnan lucrativo na otro miembronan di su cartel, sin destaho publico of sin destaho at all! Y aki tin cosnan hopi “fishy” a tuma luga. UPP ta ricibiendo y acumulando mas informacion al respecto, unda cu tin miembronan di e Raad van Toezicht di Serlimar a yuda pa “dek” cos. Riba esaki nos lo bin bek. Pero e Parlamento “otro” ta “muisstil”!
“Ni Fu Ni Fa”!
Un otro “fix bidding” cu recientemente UPP a mustra riba dje, ta esun di un incinerator pa kima “sludge”, cadavernan di animal y desperdicio medico y segun e director di Serlimar, “papelnan confidencial”!
Un inversion total di por lo menos 15 miyon florin, pa cual esunnan cu a wordo invita pa un destaho bou man, a haya apenas 15 “kalenderdagen” pa entrega nan oferta. Ta con por haci un oferta drechi den asina poco dia? Dicon tanto pura? Of acaso e amigo a haci e bestelling caba e tempo ey y lo mester fix e pa e haya e contracto aki?? Tur 7 compania, cu excepcion di esun cu ta deliberando cu ne, a protesta riba e hecho cu a haya 15 dia so. Obviamente paso aki tin un fix bidding
Nos a mustra riba e gañamento formal di tanto Otmar y Marlon Croes di DOW. Y e declaracion di e director di Serlimar cu a admiti cu a añadi cosnan extra riba e bestek pa e Destaho Bou Man aki cu a tuma luga dia 12 di december 2018. Pues no tabata tin un Destaho Publico y no tabata tin fair-play den henter esaki. Pakico?? Ken Otmar kier faborece? Pakico e director di DOW ta yuda Otmar den su manipulacion??Mirando e hecho cu un biaha mas Otmar ta actuando totalmente no-integro, nos a pidi tanto Otmar como sra. Ruiz-Maduro pa entrega nos delaster un documento entorno e destaho bou man aki. E documentonan aki lo demostra cu tin un corupcion administrativo y un faboritismo den optima forma. Nos lo por bay Ministerio Publico pa denuncia esaki. Nos lo pidi un investigacion profundo riba henter e procedura y riba tur esunnan cu ta participa den e corupcion administrativo aki. Cu Otmar ta gusta haci cosnan den pura nos tur sa. Semper ta bulldoze asuntonan y no ta duna e informacion corecto.
Ultimo cu a yega na nos conocemento ta e hecho cu lo bay over na desmantela e planta di Bouldin & Lawson pa despues entrega esaki na Daltra como hero bieu!! Con esaki ta posibel? FDA ta acepta esaki? Of esaki por ser uza como “Hush-Money” pa e corupcion cu ta tumando luga den e proyecto di HOH na unda e director di AIB, cu ta e banco di FDA, ta envolvi?? Aki tambe tin un tipo di cartel?
E representacion di Hulanda(VDA) sa di esaki? Nos no mester lubida cu, kisas nos por tin un conseho di minister cu no ta para e minister presidente Otmar of nos tin un parlamento cu ta den un soño profundo, pero por spera un reaccion si di miembronan di Tweede Kamer riba e “kapitaalsvernietiging ” aki y e destruccion di propiedad publico. Nos no mester lubida cu FDA ta haya su fondo di e pagado di belasting Arubano y esun Hulandes.
Ya caba ta casi 8 dia cu nos a pidi e documentonan y te ainda nada. Nos no por imagina nos mes cu un gobierno cu tur dia ta papia cu nan ta integro y transparente, lo no duna nos tur documento al respecto.
Loke UPP ta desea y esey ta nos enfoke, pa nos tin un pais cu ta ser goberna cu reglanan estricto di Bon Gobernacion. Nos tur sa cu e actonan manera cu Otmar ta haciendo sigur no ta cay bou di e categoria aki. Pero nos no por a spera otro. E ta un di e protagonistanan mas importante di e debacle financiero y e ta esun cu lo percura pa ningun di e otro malhechornan wordo investiga. Presencia di Otmar den e gabinete di POR-RED-MEP no solamente ta legitima tur su fechorianan pero lamentablemente e ta legitimando esun di e otro miembronan di e gang di Alibaba den e gobierno AVPOR, cu dia 12 di april tin e curashi di subi caya, mescos cu nunca nan no a kibra un copi y cu nan ta esun cu lo salba Aruba.
Nos enfoke ta keda riba esey, ni cuanto Otmar y su spindoctors purba, UPP lo keda denuncia e actonan di corupcion administrativo aki y cu e speransa cu e parlamentarionan cu tin e pretension di ta otro y critico lanta for di soño y bin para banda di e pueblo. Purba di berdad reconecta, reforsa y re- establace e ordo y disciplina pa asina ey e pueblo por haya un alivio di e consecuencia di e gobernacion diabolico di AVPOR. Tanten cu e miembronan di e gang di Alibaba ta cana liber rond y ta kere cu nan ta omnipotente, e reconexion cu ta purbando, lo no bira realidad.
“Ta pueblo so por scapa pueblo”!
