ORANJESTAD – Den un reaccion infantil riba nos observacion tocante e firmamento contra tur regla di integridad di 3 minister, Otmar a haya ta bon pa un biaha mas fulmina contra e proyecto cu  MEP a bin cu ne como e solucion duradero, sostenibel y pagabel na Parkietenbos, esta e proyecto di Bouldin & Lawson.

Laga mi ta hopi cla, su insinuacionnan ta sin base y si e ta pensa cu por tabatin cualkier iregularidad, e por bay den oficina di su “waarnemer” cu ta Eveline Wever-Croes pa puntr’e. Otmar ta de facto e Premier di Aruba, paso ta e ta fix tur cos. E ta “wheel & deal” riba tur tereno y ta e ta pone ministernan firma “bij het kruisje”!

Y si e no ta satisfecho cu e contesta e por bay puntra ing. Patricio Nicolas, cu tabata director di Serlimar. Na december 2018, e mesun Otmar a duna sr. Nicolas un reconocemento pa su bon trabou cu Serlimar Sui Generis, un persona cu a wordo nombra bou mi periodo. Si eynan tampoco e ta contento e bay puntra ir. Gisbert Boekhoudt, director di DNM, kende actualmente ta un di su conseheronan principal den henter e asunto di e fix-bidding-procedure cu ta tumando luga. Y si eynan tampoco e no ta satisfecho e por bay puntra drs. Robert Kock cu ta un otro di su conseheronan den henter e asunto di e fix-bidding-procedure ariba menciona. Y si ainda e no ta satisfecho bay puntra Frensel Giel cu ta un di e pionnan clave den proyecto corupto di HOH.  Y si eynan ainda e no a wordo satisface e por bay cerca su amigo Edwin Roos di FDA y puntr’e si tin algo a bay robes.

Y si pa cualkier motibo eynan tampoco e ta haya satisfaccion e por bay consulta e dossier cu tin al respecto y tur e serie di casonan den corte cu gobierno di MEP a gana y despues tambe e casonan cu e gobierno di AVP POR a perde.

Pero si kisas ainda e no kier acepta e berdad cu e proyecto di MEP cu Otmar y Benny a boicotia ferozmente den e gobierno di AVPOR, mi ta sugeri pa bay cerca e persona cu Otmar ta yama PAPA, referiendo asina na sr. mr. Hendrik S. Croes cu manera nos tur sa,  ta Tata tambe di su “waarnemer ” Eveline Wever-Croes (minister presidente ad interim). Papa cu ta co-doño di Croes-Wever & Tchong, kende tabata e representante di Bouldin & Lawson.

Conociendo Otmar cu ta conoci pa su manera di “handle” cu “papil”(Otmar bo ta corda e palabranan aki den e caso di corupcion di Fondo di Desaroyo San Nicolas?) cu placa di pueblo, cu ta cay bou di e definicion di corupcion, e lo no bay acepta cu den e proyecto di MEP no tin nada cu a bay robes. Ta hopi obvio cu ta su gal y su veneno e kier sigui scupi riba tur cos cu tin di haber cu e MEP di e tempo ey, cu si a sa di hiba Aruba padilanti y no e MEP di awor cu e Scorpion aki ta manipula y ta pone baila riba su tononan! E MEP di awendia ta muisstil y no ta sali na defensa di un proyecto bunita di MEP di e tempo ey.

Ta di lamenta cu un proyecto asina bunita ta bay perdi djis pa un capricho di un solo persona y pa complace cu su sponsornan, pero e esencia sinembargo di tur su atakenan ta pa purba di cera boca di criticonan. Su unico intencion ta pa tapa e berdad y esey ta cu a manda un MB cu firma di tres minister sin kenmerk, sin number y sin fecha. Y e motibo principal ta pasobra Otmar kier a evita un otro manifestacion contra su maneho dictatorial na unda ta faborece amigo, famia y sponsornan. Te ki dia e Porkeria aki ta termina? #ta basta.