ORANJESTAD – For di dia cu e proceso a inicia pa compra di e incinerator chikito pa kima sludge, cadaver di animal y desperdicio medico, nos a indica cu un biaha mas a escoge un procedura cu ta carga tur caracteristica di un “fix-bidding”!
UPP kier ta hopi cla, nos enfoke ta completamente dirigi riba e forma di procede di gobierno den e asunto aki, pasobra ora cu tin un destaho esey mester ta honesto, transparente y integro. Bou ningun circunstancia ta permiti pa privilegia un compania y/o persona. Pero den e caso aki e proyecto y su procedura hiba ta hole mas stinki cu e “sludge” cu nan kier bay kima.
Nos a mustra con kier a bulldoze e incinerator chikito aki, a pesar cu casi tur compania cu a wordo invita pa e destaho bou man a manda un carta di protesta cu nan tur a haya mucho tiki tempo pa por bid drechi. Solamente un compania no a protesta y esaki ta nada mas ni nada menos e compania cu a ser privilegia. Te hasta DOW a bisa e minister cu e companianan de facto tin rason pa por lo menos duna mas tempo of para e “fix-bidding” aki, pero e minister no tabata tin oido pa esaki.
Ora cu a habri tur e envelopnan, e resultado tabata cu en todo caso e compania cu e minister kier a privilegia, mescos cu a sosode den varios otro “fix-bidding”, NO tabata esun mas barata. Esaki DOW a notifica minister tambe den un conseho !! Pero e minister a “lap” e conseho aki “aan zijn laarzen” y doodleuk a duna DOW instruccion pa otorga e bid na e compania cu e minister obviamente kier a privilegia, uzando pretextonan incorecto y contra e berdad. Pa acelera e proceso, mesora ta duna instruccion na DOW pa laga e “privilegiado” haci e ordo mesora! Ora cu e tera a cuminsa bira cayente bou di su pianan a core firma un “Letter of Intent” cu Serlimar.
Serlimar na su turno tambe a cuminsa cu “bulldozing” di e trabounan. Un di e prome pasonan tabata desmantela e planta di Bouldin & Lawson. UPP a manda un carta pa FDA y gobierno Arubano y Hulandes, alabes parlamento di Aruba y 2de Kamer pa motibo cu aki ta trata di “kapitaalsvernietiging” y destruccion di un patrimonio di pueblo. Aki atrobe ni Otmar ni Serlimar no a “give a damn” y e desmantelacion a cuminsa diamars 23 di april 2019. Pero diripiente un dia despues,esta diaranson dia 24 di april a para tur trabou di desmantelacion. Dicon?Kico a induci pa para esaki? E por tabata e carta di UPP na e.o FDA of e articulo di UPP?
Nos a bin compronde sinembargo cu tin otro motibonan cu por cierto ta ilustra e tristo realidad con Serlimar ta wordo maneha,desde cu e minister a tuma mando di e compania estatal aki. Tin indicacion cu e director Curasoleño cu no kier a keda atras cu e privilegiamento di amigonan, a firma 2 contract cu un compania Curasoleño pa 200 mil florin cada uno?
Y pa evita mucho pregunta a manda uno SÓ pa Raad van Toezicht pa aprobacion “achteraf”? Nos mester corda cu e director por firma te 250 mil florin sin aprobacion “VOORAF” di e Raad van Toezicht. Pues e ta spierto. E sa cu e no por firma e contract pa 400 mil florin sin aprobacion “vooraf” di e Raad van Toezicht. Ta p’esey e ta “split” e contract den dos y firma dos contract di 200 mil florin cada uno. Y by the way ambos contractnan sin ningun clase di destaho. Y pa colmo ta un di e contractnan firma SO e director a manda RvT. Y un “klokkenluider” lo a notifica e RvT di e “foefje” aki di e director. Ta p’esey Raad van Toezicht a para e trabounan di e.o. e desmantelacion?
Kico ta cay bou di corupcion: “corruptie is het politieke, sociale of economische verschijnsel waarbij iemand in een machts positie deze misbruikt ten einde zich zelf of anderen gunsten te verlenen”! Despues cu mi a repasa e documentonan y alabes haya mas informacion, mi ta totalmente convenci cu Otmar y por lo menos e director di Serlimar a haci nan mes culpabel na corupcion conforme e definicion ariba menciona. Ta p’esey nos ta exigi pa nos haya copia di e documentonan, cu mi por a repasa, pero tambe otro documentonan cu mi sa cu tin pero cu mi no a haya pa repasa. A pesar cu mi no a haya tur documento pa repasa, mi por bisa pues cu, si prome di a repasa e documentonan, mi tabata tin un sospecho, awor despues di a repasa e documentonan mi no tin ningun duda y ta convenci cu Otmar ta culpabel na actonan cu ta cay bou di e loke mi a pone ariba.
Mas cla mi no por ta. Ta di spera cu Otmar no “beat around the bush”. Si UPP su acusacion no tin base, anto of Otmar of e director por acudi na corte pa exigi rectificacion. Please no purba na desvia atencion y no chicken-out!!!
