E deseo ferviente di e partido mas grandi di coalicion pa core cu un minister a wordo cumpli. E permanencia di Sra. Marisol Lopez-Tromp a keda seya cu e decision di un reunion di Comision entral, yama den pura pa atende un peticion di Gobernador, pa scucha e “sentimento” di Parlamento riba e peticion di Prome Minister pa retira e minister.

E peticion di Gobernador tambe ta cera un discusion riba e mocion antidemocratico y anti-

constitucional cu particularmente presidente di Parlamento Sr. Thijsen y lider di fraccion di MEP Sr. Tjon

a defende cu alma y cuerpo. Un mocion y acto anticonstitucional cu hasta nos Prome Minister a pidi pa no worry cu si e ta legal of ilegal.

Un actitud hopi dictatorial di parti di Presidente di Parlamento cu by the way a mustra hopi alivia, pasobra e intervencion di Premier cu ayudo di Gobernador a nifica cu su redibilidad huridico como tambe como Presidente di Parlamento a scapa pa awor di un condena di

pueblo.

Kico realmente tin tras di tur e espectaculo aki? Kico tur ta e motibonan pa core cu Sra. Lopez-Tromp? E piscamento cu harpun, tabata mas bien e excuus pa core cu e minister, pasobra e minister tabata practicamente di acuerdo cu e intencion pa yuda e piscadonan.

Tur cos mas bien a cuminsa na momento cu Sra. Lopez-Tromp a denuncia cosnan straño cu su propio antecesor a haci e.o. na Dump y Serlimar, pero tambe na otro departamentonan. E minister a sinta na januari y ya pa mei caba tabata tin e rumor cu lo bay core cu n’e. Na juli a purba, pero ey tampoco no por a yega leu. Y awor aki na october, por fin a logra, pero den un forma mesquino.

Mientras cu na juni tabata partido POR mes cu a purba di haci esaki, na october ta partido MEP ta esun cu tuma e batutu aki over. Tanto Andin Bikker como Alan Howell a declara diahuebs cu nan a keda sorpresa cu e mocion. Tin palabracion tras di cortina entre MEP y POR unda RED no ta parti di esaki? Ta e Scorpion Otmar Oduber kier regla cuenta cu e minister Lopez-Tromp y lo a exigi esaki for di MEP?

Dicon e cartera di e minister Lopez-Tromp, cu ta di partido POR, awor ta bay pa Prome Minister? Pues POR lo no nombra un minister mas? Esaki ta loke a wordo negocia? MEP lo percura, hasta na un forma mesquino y anti- constitucional,pa baha e minister, pero cu e condicion cu nan ta haya e cartera? Kico lo para cu e investigacionnan cu mester a cuminsa na Serlimar cu minister Lopez-Tromp a anuncia y a inicia? Asuntonan straño cu Prome Minister, cu su cara di “yo no fui”, pa di tanto biaha ta bisa cu e “no sa di nada”? E mocion di MEP pa baha e minister a resulta di no tin ningun balor.

Gobernador a haci uso di un peticion pa retira minister Lopez-Tromp NO pa motibo di e mocion di parlamento, pero pasobra ministernan cu excepcion di minister Lampe a duna di conoce cu no por traha mas cu minister Lopez- Tromp. Gobernador na su luga a acerca Parlamento pa verifica nan sentimento pa retira e minister.

Ma no ta esey a wordo vocifera den e mocion ILEGAL? UPP ta convenci cu Hulanda ta hinca tras di e maniobra pa retira e Minister. Gobernador lo a busca conseho cerca gobierno di Reino, den e caso aki secretario di Estado Knops, pa guia con pa resolve e dilema aki di un forma adecuado.

UPP tambe ta convenci cu Minister-President lo mester a acerca Knops pa un intervencion Hulandes evita cu gobierno POREDmep lo mester entrega su retiro.

UPP ta convenci cu e intervencion di Gobernador tabata necesario pa defende interes Hulandes na prome luga. Si gobierno cay awor aki, esaki lo nifica otro eleccion, otro tardansa pa Hulanda por ehecuta su CHE y Raft posibel obstaculo si un gobierno nobo no cumpli cu e condicionnan indecente Hulandes.

Loke a logra ta un “win win” pa Minister-President y pa Hulanda. E ganashi pa gobierno ta evidente. E ganashi pa Hulanda tambe. Aruba lo bay di acuerdo cu tur e exigencianan Hulandes y evita pa gobierno cay. Pronto nos lo bay tende cu Aruba a yega na un acuerdo cu gobierno Hulandes. Y cuidou cu esey ta e caso. Nos ta bende nos autonomia pa puesto di un minister (den e caso aki baha un minister) mescos cu e 12-8?? Ya awe Prome Minister a indica cu tur cos lo ta cla, pero kier djis lesa e texto.

Preguntanan cu sigur den e simannan aki nos dilanti nos lo bay ta hayando contesta.

A pesar cu nos por biba cu e trayecto constitucional awor si a wordo practica manera cu lo mester ta, e pregunta ta kico a pasa cu Ricardo Croes di RED, kende no ta eens, pero ta eens toch pa e minister bay. Acaso tin un promesa haci na Ricardo Croes riba e tereno di CANABIS? E siman aki Prome Minister, despues di a bisa cu e aña aki lo no realisa nada mas riba e tereno aki, diripiente tabata hopi positivo cu logronan grandi a wordo haci pa por inicia cu esaki, kisas pa fin di aña ainda. P’esey actitud di Ricardo Croes a bolbe cambia? Un actitud hopi ambivalente! Den pasado un politico Hulandes a wordo yama “FLIP FLOP”, esaki ta aplicabel aki tambe?