Ultimamente nos por mira cu integrantenan di gobierno di Aruba tin e sindroma di ta gañado patologico y kier pone nos pueblo kere cu loke nan ta bisa ta berdad. Dia pa dia, nan ta perdiendo tur clase di credibilidad. Nos a mustra caba na multiple ocasion con prome minister Evelyne Croes a bin ta trata na bende nos un cuenta cu ta Hulanda a impone e.o. e condicionnan Hulandes pa por sigui haya ayudo, mientras di otro banda Hulanda na su turno ta bin liña recta y bisa cu tur loke a keda acorda ta a base di loke a delibera cu Aruba. Asina aki nos por mira con, sin un consulta real cu gremionan, prome minister di Aruba a cera un combenio cu Hulanda riba diabierna 13 di november 2020, perhudicando nos pais y nos institutonan.

E gañamento a plama manera un pandemia den e gobernacion aki. Recientemente minister Andin Bikker a declara di no tin nada di haber cu e acusado di pedofilia, ya cu e persona aki lo no ta traha cu n’e. UPP pa awor lo abstene pa duna un opinion riba e caso mes, pero energicamente ta opone tur tipo di abuso sea mental, fisico of sexual y sigur casonan repudiabel di pedofilia.

UPP ta cuestiona e actitud di e minister di Husticia cu diripiente ta purba di distancia su mes for di e persona. Segun e mandatario su ministerio lo ta deal cu un compania di locual e casa di e acusado lo ta directora y e acusado lo ta un trahado. E minister parce di tin un memoria selectivo, pasobra tin asina tanto evidencia cu ta relaciona e persona aki cu Otmar Oduber ,e circulo di POR y hasta di e mesun minister Bikker. Lo a haci husticia y honor na e berdad y na e victimanan, si minister Bikker por djis admiti cu e acusado tabata traha cu n’e, pero debi na e situacion cu a presenta lo e no ta den e circulo di e minister mas. Pero NO ban sigui gaña numa, manera a para custumber den e gobierno aki.

Un otro ehempel ta minister Dangui Oduber. Dialuna 21 di februari, mi a acudi na San Nicolas, Santa Theresita Center, pa mi haya mi vacuna. Pa defende su pellejo contra critica di un parlamentario opositor di ta faborece amigonan politico, Minister Oduber a haya ta bon pa usa como defensa cu e opositor mas grandi di gobierno ta prome pa tuma vacuna na San Nicolas. Pa cuminsa, Booshi Wever, como ciudadano, a aplica pa un cita pa vacuna y a acudi riba e dia cu un instancia di gobierno a invit’e. Pakico e minister no a respeta privacidad di mi persona y mester a politisa un acto asina? Dicon minister no ta bisa cu ora nan a bin invita Booshi Wever pa saca potret mi a nenga pasobra mi no tabata desea di ta un otro decoracion den e kerstboom politico. Esaki ta un otro muestra cu e gobierno aki ta biba di gañamento pa gañamento.

E gañamento patologico aki ta bira un problema ora cu esaki haci acto di presencia tambe den e instancianan di gobierno, manera ta p.e. e caso di Tele-Aruba. Aparte di gañamento tin un maneho cu ta dirigi riba manipulacion orkestra dor di gobierno y dirigi pa e director G. Kock cu ta sigui e instruccionnan sin hik. Pronto nos lo bin back riba e maneho aki cu ta bay contra tur regla di “fair-play” y e derecho sagrado di expresion. Na September venidero sinembargo pueblo lo haya e oportunidad pa caba cu tur e gañamentonan y manipulacionnan. UPP den su REBOOT 2.0 ta priminti un manece nobo pa e pueblo di Aruba cu ta percura pa e felicidad y prosperidad yega den tur hogar na Aruba.