Dia 25 di januari mester ta un dia mester di fiesta, pa asina nos por recorda e fecha di nacemento di un gran yiu di tera, kende cu su perseverancia, dedicacion na un causa y su amor patrio, apoya pa e pueblo Arubano a percura pa Aruba logra su Status Aparte.
Pero awe e circunstancianan ta otro, no e pa motibo di e pandemia, sino pa motibo di e rumbo cu e ultimo gobernacionnan a hiba nos aden, cu al final a resulta den un entrega total.
Atrobe nos di UPP ta pidi pa awe ta un dia di reflexion serio y profundo!! Un dia di reflexion pa loke ta causa di e pueblo aki y cu Betico Croes, Tata Di Nos Pais, a percura pa realisa. Un dia di reflexion riba e rumbo cu e pais aki ta aden, y cu ta bay diamentralmente contra loke Betico Croes a lucha y logra, esta Aruba para riba su mesun pia.
Nos ta kere cu Tata Di Nos Pais y tur otro cu a premira y a lucha pa nos Status Aparte, awe mester ta hopi desapunta, pa motibo di e entrega di nos autonomia por medio di varios protocolnan cu a pone cu Aruba de facto ta wordo goberna desde Den Haag.
Partidonan ta grita di un banda “liberacion” y otro ta grita “recuperacion”! Pero loke nos ta ripara ta e hecho cu ni un ni e otro kier acepta cu nos ta canando COHO pa motibo di mal gobernacion di e ultimo 12 añanan! Y NO tin cambio den esaki!
Nepotismo, patronahe politico, mal gobernacion, manipulacion etc. etc. ta na ordo di dia!
E situacion cu nos pais ta aden awe, antagonismo y polarisacion riba tur spectro di nos comunidad, un mundo politico asina dividi, loke ta keda refleha den un Parlamento y un gobernacion zwak. Sin ningun escaso señal di kier traha cu otro, pa razonnan puramente partidista.
P’esey UPP ta kere keto bay firmemente den un gobierno nacional, consistiendo di algun profesional, cu ta wordo dirigi di un banda pa un dialogo nacional y controla pa un parlamento nacional cu ta carga su legitimidad basa riba e votonan cu a wordo deposita den e ultimo urna electoral.
Y e idea aki, e pensamento aki, no ta algo cu UPP a inventa. Ta algo cu e Tata Di Nos Pais a practica den e formato di RCOA. E si a mira e tempo ey, pa nos den un union di tur gremio y tur partido, yega na un punto di salida comun pa convence Hulanda, cu ARUBA ta merecedor di un Status Aparte. Incluso na cierto momento, ora di entrada den e constelacion nobo di Reino, mientras Aruba tabata pasa den e debacle di cierre di refineria, el a propone e idea di un Gobierno Nacional, pa asina hunto Aruba por start sali den un era nobo como Pais den Reino Hulandes.
A pesar cu ta 5 pasa di 12, nos ta kere firmemente cu ainda nos tin tempo pa traha riba e pensamento aki di un gobierno nacional, pa asina nos drecha loke mester wordo drecha y purba scapa loke por a resta di nos autonomia.
Pues awe ta un dia nos di reflexion, pa asina nos pensa si nos kier para e direccion cu nos Pais ta bayendo aden, nos scoge stop di biba na rudia y stop di cana coho.
