Despues di a scucha e declaracionnan di minister Ursell Arends y e silencio hermetico di partidonan politico tanto cu representacion den Parlamento y esnan cu no tin representacion den Parlamento, mi conclusion ta cu definitivamente e ciere di Serlimar ta mas cu obvio. E desangramento di Serlimar a cuminsa for di prome cu aña 2001 caba, na unda a lanta Aruba Bunita NV cu e meta aki. Danki na e cambio di gobierno di MEP na fin di 2001, a para e “SANGRAMENTO” aki. Hopi ta esnan cu a purba di stroba pa Serlimar ta existoso. Gobierno di MEP e tempo ey, sostene pa un mayoria den Parlamento, a logra pone Serlimar S.G riba un bon caminda. Forzanan aheno a trata na tur sorto di manera pa stroba e gobierno di MEP pa pone Serlimar riba rails bek.

E principio social democrata ta dicta cu un compania di utilidad estatal (patrimonio di pueblo) HAMAS Y nunca por ser bendí. Hopi sacrificio a ser haci pa pone Serlimar bek riba rails. Companianan priva a haci tur esfuerso, yudá grandemente pa AVP y gremionan pa stroba e gobierno di MEP di e tempo ey logra tene Serlimar habrí. Na 2005 e ley di Serlimar a wordo presenta y acepta door di Parlamento, hustamente cu e meta pa percura pa gobierno, por medio di e compania estatal SERLIMAR, cumpli cu e tarea di recohe y procesa desperdicio di un forma efectivo, efficiente y financieramente sano. Un rapport di PAHO encuanto e dump na Parkietenbos a mustra e importancia y necesidad pa Aruba inverti den un maneho drechi di desperdicio pa evita un desaster ecologico, pero tambe evita cu mas habitante di e bario sigui sufri malesanan pa motibo di e dump.

E desangramento di Serlimar a bolbe cuminsa bou di e gobernacion di AVP. Durante 8 aña di gobernacion di AVP nada no a sosode pa alivia e bario di Parkietenbos al contrario a boycotea henter e proceso. E unico accion tabata pa opone e solucion cu e gobierno di MEP a logra cu e acuerdo di B&L. A hasta bay asina leu di boycotea B&L cu consecuencianan financiero pa pais Aruba despues di tantisimo caso cu a perde den corte y pio ta cu a laga un bario completamente desampara. E desangreamento a sigui bu di gobernacion di POREDmep. E rapport di PAHO a wordo “(mal)usa” pa ex-minister Otmar Oduber pa logra saca mas fondo publico pa yuda recompensa interes di su sponsernan. Aki por a tuma nota cu Otmar a haya sosten incondicional di e MEP (cu ya no ta un partido social democrata mas) den gobierno y parlamento. Na final di cuenta nada no a sosode cu dump mientras su sponsernan si a logra saca probecho financiero di un pais cu ta bancarota. Na aña 2018 a firma un contracto fabuloso y miyonario pa e procesamento di e desperdicio cu Serlimar mes tabata haci existosamente. Aki gobierno tabata paga Serlimar 5.4 miyon florin pa aña pa e servicio cu Serlimar (DVO) tabata duna gobierno pa asina ey gobierno por cumpli cu su tarea cu ta ancla den e ley di 2005 cu tabata nifica cu SERLIMAR por a cubri su gastonan y cu un saldo positivo.

Desde 2020 Serlimar ta paga mas o menos 6 miyon na e compania priva pa procesamento di desperdicio residencial y comercial, manteniendo e mesun gastonan. Loke ta nifica un saldo NEGATIVO pa Serlimar. Con Serlimar por sobrebibi?

E minister actual di RAIZ parce di kier pone e cherry riba e bolo y finalmente logra definitavamente cera Serlimar. Su tan afamado “trash to cash” parce di tin un solo meta y esey ta cumpli cu companianan priva pa nan tuma e maneho di desperdicio na Aruba. E manuscripto con pa deshasi di patrimonio publico, manera a casi sosode cu SETAR, parce di a wordo saca for di lachi. Remarcabel atrobe ta cu ningun partido ni den gobierno ni den oposicion ta tuma e postura di defende patrimonio di pais Aruba. Ta algo insolito cu delaster un gremio ta kedando keto y te hasta e sindicatonan !Ta parce cu “por la plata baila el mono”!

Esaki nifica cu finalmente e cortina a cay pa Serlimar. Nos por consdira e fase cu Serlimar ta aden awor aki como e epilogia di un historia tristo. Tristo pa realisa con nos interes ta wordo masacra door di un gobierno di MEP, un partido cu supuestamente ta un partido social democrata, cu a logra su Status Aparte pa despues sacrifica esaki pa motibo di mal maneho. E bandera di Aruba ta na suela y nos pueblo na rudia. (y e ta canando coho)!

Minister Arends a bisa cu un era nobo den procesamento di desperdicio a cuminsa pero a lubida di bisa cu e “cortina pa Serlimar definitavamente a cai”!