Siman pasa Aruba por tabata testigo di otro capitulo scur den nos Democracia y Estado di Derecho. Un desaroyo no desconoci pa nos pueblo, cu parce a bira custumber den nos sistema politico y cu hende ta bira immuun, pa e tantisimo actonan bochornoso di nos politico- y gobernantenan.

Gobierno y Parlamento t’ey pa sirbi pueblo pero ultimamente e interes di pueblo ta wordo lubida y mas bien ta concentra riba propio beneficio/interes. A pesar cu ta bisa cu e hende ta central, nos ta tuma nota cu ta “pick & choose” kende nan kier pone central.

E atraco riba nos democracia ta refleha den tur departamento di gobierno y scolnan.

Sinembargo, como partido politico sin representacion den Parlamento, UPP ta kere den nos Status Aparte, nos hendenan y nos futuro. Nos por miho! Pero cambionan ta necesario den nos Staatsregeling mescos den nos Reglamento di Ordo di Parlamento (RvO).

Pa cuminsa, aunke e RvO di Parlamento ta hopi cla den esaki, den articulo 27 mester agrega e palabra “op elk moment tijdens de vergadering” (pues tanto ora di “beraadslagingen” y ora di votacion).

Den nos Constitucion (Staatsregeling), tambe mester bin cu cambionan, paso ta hopi cla cu mal uzo a wordo haci di esaki, pa finan oportunista sin precedente. Asina den Capitulo II articulo 2 mester agrega, cu si no tin e confiansa mas den un minister, esaki MESTER ta por medio di un Mocion di Desconfiansa den un Reunion Publico y no via un reunion di Comision Central na unda e minister envolvi NO por a defende su mes y particularmente contradeci varios mentiranan cu ultimo dianan nos por a tende.

Un otro articulo den nos Staatsregeling cu tambe lo mester tin cambio ta Capitulo III articulo 16. E RvO di Parlamento mester determina cu na TUR momento MESTER tin un mayoria di por lo menos 11 parlamentario den e sala di reunion. Di e forma aki ta kita tur duda cu por tin, cuanto hende mester ta presente den e SALA. Ta necesario pa den inciso 2 di e articulo aki añadi un aclaracion kico ta “volstrekte meerderheid”. UPP ta sugeri pa agrega: “volstrekte meerderheid van stemmen van de zitting hebbende leden “! Asina por evita cu cualkier decision y sigur uno pa baha un minister por sosode cu 10 voto y den e caso recien te hasta cu 9 voto legal.

E cambionan sugeri ta indispensabel, paso loke a pasa ultimo simannan a demostra cu practicanan devastado pa nos democracia y constitucion, ta keda na ordo di dia. Palabranan manera integridad, honestidad y transparencia parce di no ta existi den nos cultura politico mas y ta net e tipo di practicanan aki a causa e situacion cu Aruba a wordo hinca aden e ultimo 10 añanan. Y awe nos tur ta sinti e consecuencianan di esakinan.

Y hustamente ta e Parlamento mester cumpli cu RvO di Parlamento y mester actua di un forma mas transparente, pa asina e pueblo, e ciudadanonan di e pais aki por tin confianza den su representantenan.

Nos por mira incluso, con e partido di oposicion a sali afo reclama e bagamunderianan aki, pero ta lubida con tempo cu nan tabata tin e mayoria den Parlamento, tambe tabata haci y deshaci.

Parlamento ta e legislado, y si NAN mes como “hoogste orgaan” NO ta tene nan mes na Ley y no ta cumpli cu transparencia, ta kico lo resta pa e otronan e ora? E presidente, e Griffier y e parlamentarionan ta e prome yamanan pa CUMPLI cu e Reglanan di Good Governance, no ta Ministronan so.

Y nos Parlamento ta e prome yama pa cumpli cu e reglanan, pa asina por hiba su control pa mira cu gobierno y su gobernantenan ta implementa e reglanan aki tambe. Ta bunita papia awor cu lo bay firma pa haya ayudo financiero Hulandes, pero na momento cu bo no tin Good Governance in place, e ayudo financiero aki lo no ta efectivo al final pa yuda pais Aruba y su pueblo bay dilanti!

Di e forma aki, UPP no ta critica so, pero kier duna un contribucion real y constructivo pa yuda na fortifica nos democracia cu lo tin su consecuencia positivo pa nos autonomia y por evita cu den futuro tipo di practicanan por ripiti. A yega e momento pa nos mustra mundo henter cu nos realmente ta merecedo di nos Status Aparte door di a pone Aruba atrobe riba “the right track” cu introduccion di e reglanan estricto di Good Governance. UPP ta convenci cu aparte di esaki mester bin mas cambionan fundamental cu lo conduci cu nos por ta un partner cu dignidad den e Reino Hulandes na unda nos estado di derecho ta wordo respeta.

Esaki lo ta e compromiso di UPP pa nos pueblo, esta mara mannan di e politico pa nos logra e dignidad y respet aki.