Otmar Oduber ta sigui cu su campaña di manipulacion di opinion publico, cu e unico obhetivo pa influencia y convence parlamentarionan, cu ta cuestiona cambio di ley di Serlimar di 2005. Un ley cu por cierto e mesun Otmar a vota contra na 2005.

Na dos ocasion caba parlamento a debati riba e ley y tur dos biaha esaki a wordo suspendi abruptamente, pasobra no tabata tin sosten pa pasa e ley. Pa logra haya sosten Otmar a trata den tur sorto di forma pa cambia parti di e ley, resultando den un ley completamente ‘gelapi’. Pero te ainda e no por a convence e parlamentarionan di su coalicion pa vota pa e ley aki.

Pues siendo e scorpion cu nos conoce, Otmar a dicidi di cambia strategia y hiba e debate den un full otro rumbo di salud y uzando awor diripiente rapport di PAHO como arma principal.

Remarcabel ta cu den e ley mes Otmar casi no ta haci mencion di e aspecto di salud. Den e MvT riba pagina 3 el a referi na e rapport di PAHO, pero respecto e aspecto di medio ambiente. Su excuus ta cu e no kier a uza e dolor y sufrimento di e habitantenan pa pasa e ley.

Diripiente awor si esaki, uzando rapport di PAHO, a bira importante. Diripiente ta uza contacto cu un habitante pa purba di hustifica su ansha pa ‘bulldoze’ e cambionan. Pakico e no a uza e rapport aki pa contraresta e ponencianan di e rapport di Arcadis? E contesta ta simpel. Otmar tabata convenci cu e lo haya sosten di coalicion den parlamento.

Otmar a invita pueblo pa lesa e rapport di PAHO, cu lo a sugeri cu dump lo mester ta cera ‘ayera y no awe’ pa motibo di e peliger eminente pa salud di e personal di dump como e habitantenan di e bario.

UPP a acepta e invitacion y a bay lesa e rapport. Na prome luga ta trata di un investigacion cualitativo y subhetivo cu a dura 3 dia. A evalua pues e calidad y no e cantidad y a duna un opinion personal despues di a cana rond y papia cu un cantidad di hende den solamente tres dia. Na ningun momento por a lesa cu tin un estudio di ultimo añanan cu dato confiabel cu ta indica con dump a influencia e estado di salud di e habitantenan ni di e personal. Es mas por a puntra SVB cuanto personal a acudi cerca nan mediconan pa control di malesa, cu lo por ta relaciona cu posibel infeccion contrae na dump. No tin nada. PAHO a bisa esaki tambe:

“Una de las dificultades que se tiene en está consultaría, para definir a la población expuesta a los riesgos directos o indirectos del manejo inadecuado de residuos sólidos, reside en el hecho de que NO existe en Aruba los sistemas de información y monitoreo sobre salud y ambiente, mucho menos los estudios epidemiológicos que demuestran esa relación de mal manejo de residuos y afectación del ambiente y la salud de la población”!

Di unda diripiente Otmar ta saca afo cu e aspecto di salud ta e motibo principal pa e cambio di ley aki? Awor cueste lo que cueste ta uza aspecto di salud pa logra convence un mayoria pa bulldoze e ley aki.

Loke a resalta ta cu PAHO ta papia constantemente di remedia e situacion di Parkietenbos, pasobra djis cera no ta recomendabel tampoco. Te hasta a sugeri pa mira kico por ser haci cu e ‘planta de reciclaje’ referiendo obviamente na e WasteAway plant di Bouldin & Lawson. Te hasta ta sugeri lo siguiente: “……, que analice la viabilidad de funcionamento de las dos infraestructuras, la que esta inoperativa y la que tiene en funcionamento Ecogas, independientemente de su condición privada”.

Pero aki Otmar ta keda ‘calladito’, dicon?

Ta obvio cu UPP tambe ta preocupa pa e salud di tanto e habitantenan como tambe e personal di dump. Pero pa un solucion berdadero y duradero lo mester bin na prome luga cu un plan integral, loke ta un di e recomendacion principal di PAHO tambe. Un plan maestro prome cu introduci un ‘ley gelapi’ cu ta enfoca riba un parti so di un plan integral. Esaki UPP a yega di señala caba, cu e minister aki ta gusta traha ad hoc! Banda di UPP y PAHO, Raad van Advies tambe a señala esaki.

UPP ta mas cu nunca convenci cu no por bay di acuerdo cu e plan macabro di Otmar, cu tin como unico meta faborece su sponsornan di campaña, cu lo tin como resultado un monopolio pa procesamento di desperdicio door di ‘amigo’ y finalmente un aumento di gasto pa pueblo.

Nos tur sa cu e gastonan di Serlimar a subi drasticamente y e subsidio cu gobierno ta duna no ta alcansa pa sigui paga pa esaki. P’esey Otmar no kier suministra e cifranan di 2018 y 2019, unda lo sali na cla cuanto ta paga pa e 22 trucknan, mescos pa contracto lucrativo di Sero Tijshi, huur di edificio na Pos Chikito, desmantelacion di planta di B&L, e incinerator chikito cu lo sali rond di 17 miyon den 5 aña y e cantidad di hendenan cu a ser tuma den servicio.

E grito emocional cu e cambio di e ley di 2005 ta e yabi pa e solucion, ta un otro sprookje. E ta mas bien e yabi pa NO habri e Caha di Pandora, unda cu lo por sali na cla e tantisimo actonan coruptivo di e minister y su pandiya di gangsternan, cu ta dirigi Serlimar actualmente cu yen menasa y intimidacion.

No ta abo cu Benny S. tabata orkestra e boycott di e planta cu awor PAHO ta conseha pa hacie operativo? E tempo ey si e aspecto di salud no tabata importante! Al contrario bo no a ‘give a damn’ cu e pueblo ni cu nan salud ni cu e molester!