Booshi Wever: Un gemeente lo haci e deficit democratico existente entre Hulanda y Aruba mas grandi ainda!

Recientemente nos a tuma nota di declaracionnan haci dor di tanto Prome Minister Wever-Croes y Presidente di Parlamento Thijsen tocante e tema di “gemeente”, cu ultimamente ciudadano Atan Lee a bin ta propagando bou di pueblo. Asina a cuminsa cu un accion di firma pa exigi un referendum na Aruba pa por scohe entre Status Aparte of bira un “Gemeente”!

UPP mesora dia 13 di mei 2020 den un comunicado di prensa, a declara enfaticamente di NO ta na fabor di un “gemeente”. Nos a y ta lamenta si cu e discusion no ta basa riba argumentacionnan sensato, mirando cu esaki a bay for di man y hasta a bira personal.

Tambe di un banda, ta tilda tur politico na Aruba di ta corupto y di otro banda ta punta dede den direccion di Hulanda, cu lo ta mas corupto cu e politiconan Arubano.

Nos ta reconoce varios di e argumentonan treci dilanti, cu por conduci na pensa riba un “gemeente”, pero nos a mustra cu un cambio di nos status estatal huridico no ta duna garantia cu nos lo por caba cu corupcion sin mas. UPP ta convivi cu e e ansha cu ta ser vocifera pa hopi con-ciudadanonan, cu dor di e pandemia a bin realisa con vulnerabel nos ta financieramente y con dependiente nos ta di tin un solo pilar economico. Cu ceramento di nos frontera mas di 80% di ingreso di nos pais a cay afo. Algo cu nos a bin ta adverti pe pa hopi tempo caba.

Parcialmente Sr. Lee tin rason cu nos situacion actual, ta pa motibo di mal maneho di ultimo 34 añanan. UPP sinembargo no ta comparti e pensamento cu e yiu no por sigui bay cerca su tata pa busca placa, mientras e ta pretende di kier ta para riba su pia. Loke e ta bisando ta cu nos mester bay drenta cas di mayornan bek y biba comodo riba nan custia.

UPP en cambio ta kere cu e mayornan mester yuda si por, pero na mes momento tin e obligacion di coregi loke e yiu por ta haciendo malo. Na su turno e yiu mes mester realisa cu e ta hibando su cuentanan malo y cu e mester mustra for di propio boluntad, cu e ta bay drecha su forma di hiba su bida.

Esaki ta exactamente loke UPP ta kere aden. Ban percura pa nos drecha nos mesun asuntonan, ban mustra mundo henter cu nos mes por bin cu un set completo di reglanan (y no 2 so) cu ta percura pa nos cumpli cu e normanan di un gobernacion drechi. Anto esaki nos mester hacie for di un punto di bista di union y compromiso. Nos mester realisa cu nos ta hopi laat caba, pero cu si nos mustra nos bon boluntad, nos ta convenci cu gobierno Hulandes lo no bay na pone mas presion riba nos pais, pero lo bay saca un man y yuda nos sali di e situacion aki.

15 di juni Prome Minister ta duna un splicacion dualistico encuanto e tema di “gemeente” cu obviamente a trece duda cerca hopi cuidadanonan. Di un banda e ta bisa cu si bira un “gemeente” nifica solucion di nos problemanan financia nos mester por evalua esaki. Di otro banda e ta expresa cu e problemanan cu nos pais tin lo no por wordo soluciona cu un status di “gemeente”!

Den Amigoe di 17 di juni 2020, ex-parlamentario Hulandes, John Leerdam, ta mustra bon cla cu status di e islanan BES, cu asina tanto ta wordo gaba, NO a trece ningun clase di adelanto pa e pueblo di e islanan. E ta mustra tambe riba e nivel di pobresa riba e islanan BES cu a aumenta. Leerdam ta pone bon cla cu e proyectonan grandi manera di caminda, scolnan etc., Hulanda por haci nan tambe SIN cu e islanan aki tin un status di “gemeente”.

E ta mustra tambe riba e deficit democratico ora cu Den Haag a stop eleccion di na St. Eustatius, pasobra ey tambe lo tin cosnan cu ta pasa cu no ta bon. Mientras nos tin comprendi cu na Bonaire tambe ta e Hulandesnan ta “wheel & deal” den asuntonan di gobernacion, ya cu e isla mester haci esaki di acuerdo cu “Bestuursakkoord” cu tin.

Nos no a tende e otro partidonan aki na Aruba, particularmente esnan den Parlamento, cu excepcion di Presidente di Parlamento Thijsen. Sr. Thijssen, kende a mustra cu nos mester atene nos mes na loke nos tin, esta e Status Aparte, pero no bisa net nada cu nan ta dispuesto pa trece cambionan fundamental pa caba cu mal gobernacion.

Si Aruba keda insisti di sigui goberna nos pais na unda corupcion, politica di patronahe politico etc. ta ordo di dia, nos mes ta habri e porta pa Hulanda bin interveni. Di otro banda goberna cu e reglanan estricto estableci di Bon Gobernacion, nos ta haci nos MERECEDOR di nos Status Aparte. No ta pornada Betico Croes dfm a considera e Status Aparte un klompi diamante, cu el a pidi nos conserva. Esaki nifica tambe cu nos mester por haci miho, di loke nos a bin ta haciendo cu nos Status Aparte, algo cu den un “gemeente” nos lo no tin un futuro manera Betico Croes tabata wak pa nos.

Asina so nos lo deshaci di e deficit democratico den Reino na un manera drechi y nos lo hiba nos Aruba y nos pueblo na e normal mihó!