Repsol a cuminsa bora, sinembargo tin nan no ta cumpli cu ley local.

Manera Bon Dia ta treciendo dilanti pa basta tempo caba, aunke Repsol ta keda insisti cu e proceso pa bora den nos awanan (zona ecomico EEZ) ta na standard di tur regulacion internacional y nacional, ta keda demostra cu e compania Spaño ta violando capitulo 5 di e Petroleumlandsverordening/Petroleumbesluit.

Esaki por lesa tambe den e ESHIA cual ta e rapport cu nan a laga traha pa entre otro mustra e impactonan riba medio ambiente. E compania cu a traha e rapport aki, yama Avisian, ta cita for di e leynan local. Sinembargo ta laga full e capitulo riba e descarga di desperdicio afo.

Experto ta keda bati alarma
Durante e simposio pa derecho di naturalesa organisa pa Raiz, un experto atroba a vocifera su preocupacion. E biaha aki el a trece dilanti cu Repsol lo a gaña na instancianan no gubernamental (NGO nan) riba e riesgonan cu ta envolvi den boramento y tambe cu nan mes no a analisa e rapport bon unda ta mustra cu Repsol lo bay actua contra ley local pa e desperdicio.

E persona aki ta Leo Henriquez, kende ta un experto riba tereno di gas y petroleo. El a indica cu un di e puntonan cu e compania di petroleo a anuncia ta cu durante e boramento lo descarga tur sorto di desperdicio a consecuencia di e actividadnan.

“Lo uza dos tipo di drilling mud, uno cu ta wordo traha a base di awa di lama y un otro a base di petroleo sintetico. Y specialmente e ultimo aki por causa hopi daño na e medio ambiente. Pero tambe den e drilling mud a base di awa di lama kimiconan hopi peligroso por wordo uza y descarga”, asina e experto ta bisa.

Normanan internacional
Como ehempel e experto di SIA (Sociedad di Ingeniero di Aruba) ta señala cu unda e la traha pa mas cu 30 aña, esta den Mar Norte, tur tera rond di e lama aki, cu ta Irlanda, Gran Britania, Noruega, Icelandia, Suecia, Dinamarca, Alemania, Hulanda, Belgica, Francia, Spaña y Portugal no ta acepta cu e desperdicio contamina cu drilling muds a base di awa di lama y petroleo sintetico ta wordo descarga asina sin tratamento of un permiso. “E teranan aki ta uni den un Tratado di OSPAR di 1992 pa proteha e Mar Norte.”

Minister: ‘lo investiga’
Minister di medio ambiente y infrastructura Otmar Oduber (POR) a reacciona bisando cu e ta na altura cu e departamento cu ta cay bou su responsabilidad esta Directie Natuur en Milieu (DNM) a duna un ontheffing/excepcion pa por exporta desperdicio na Merca.

“Si en caso esaki ta tumando luga DNM y tambe sigur Departamento di Salud Publico (DVG) ta na altura y ta envolvi pa loke ta trata conseha gobierno riba e asunto di boramento den nos awanan teritorial.” Mester añadi cu actualmente Repsol ta bora den e zona economico (EEZ). Unda tambe e leynan menciona ta aplicabel.

Ya pa algun dia di loke nos por a compronde boramento a cuminsa pues tur permisonan a wordo otorga pa asina Repsol por opera. “Mi por sigura cu di mi ministerio no a duna ningun permiso sin conseho di DNM.” Sinembargo, segun ley por duna excepcion solamente pa tira awa di toilet den lama si pidi aprobacion di antemano. E minister alabes a expresa na pregunta di un periodista di Bon Dia cu e no ta un experto riba e topico.

Mester bisa cu e minister encarga cu e proyecto aki, ta esun di energia, kende ta nos prome minister Evelyn Wever-Croes. Bon Dia a manda pregunta na e mandatario pero no a ricibi contesta ainda. Tambe nos a manda pregunta pa Repsol dicon nan no ta tene cuente cu e ley local.

Finalmente tin un grupo di personanan cu ta purbando di filma e efecto cu e boramento aki tin riba nos awanan. Nos lo purba haya contacto cu e grupo di persona aki.