Despues di un cantidad di retraso, un sistema pa colecta plastic flotando den ocean Pacifico entre California y Hawaii ta dunando resultado, segun su inventor Hulandes a bisa ayera.
Boyan Slat, kende a dropout di universidad pa funda e nonprofit The Ocean Cleanup, a anuncia cu e boom flotante ta colectando desperdicio di tamaño for di un net y taira di auto te cu chip di plastic di apenas 1mm.
E resultadonan ta suficiente prometedo pa cuminsa designa un segundo sistema pa manda na e Great Pacific Garbage Patch, un area di plastic flotante dos biaha e tamaño di Texas, segun Slat.
Pero el a pidi precaucion, bisando, ‘si e biahe na e punto aki a siña nos algo, ta cu definitivamente no ta bay ta facil’.
E boom flotante cu un screen 3m profundo tin como meta pa actua como un linea di costa, trapando algun di e 1.8 triyon pida plastic cu cientificonan ta calcula ta flotando den e patch, mientras ta permiti bida marino landa di forma sigur bou di e screen.
Despues cu el a ser hiba en lama aña pasa , e barera no a trapa niun sushi den su prome simannan, pasobra e tabata move na mesun velocidad cu e plastic. E problema ey a soluciona uzando un parachute bou awa pa reduci e velocidad di e boom pa e catch desperdicio cu ta move mas lihe.
Ademas, fin di aña pasa, e barera a kibra bou e golpi constante di biento y olanan di Pacifico, rekeriendo cuater luna di reparacion prome cu a bolbe lans’e for di Vancouver na juni.
E sistema tambe a experimenta un problema di ‘overtopping’ – olanan cu a pusha e plastic riba e linea flotante cu ta sostene e screen. Esey a resolve uzando un linea di corki mas grandi pa tene e plastic.
E organisacion kier continua desaroyando e trap di plastic, haci nan mas grandi, y manda mas di nan den Pacifico pa nan por colecta miles di ton di plastic cada aña. Sinembargo, Slat no a bisa ki tempo e segundo version lo ta cla pa su lansamento.
Organisaicon di Slat ta un di un grupo chikito trahando pa colecta desperdicio for di lama habri. Tin mas cu suficiente pa nan tur.
Ta calcula cu entre 600mil y 800mil ton metrico di ekipo di piscamento ta bandona of perdi durante tormenta cada aña den ocean, segun e Trash Free Seas Program na Ocean Conservancy, un grupo ambientalista nonprofit.
Otro 9 miyon ton di desperdicio plastico, incluyendo boter, saco, co’i hunga y otronan, ta yega cada aña den ocean for di beach, riu, y bahia, segun expertonan.
Slat a bisa cu e proximo stap ta pa aumenta e escala di e aparato y haci esaki mas fuerte, pa e por keda riba lama pa mas largo y tene tur e plastic cu e colecta pa un aña of mas, prome cu un barco colecta e desperdicio.
