(NLTimes) – Booking.com a bisa ayera cu lo paga back e 65 miyon euro cu a ricibi di ayudo estatal Hulandes, segun noticiero nacional, NOS.
Siman pasa a sali dilanti cu e compania holding Mericano di e compania basa na Amsterdam a paga e ekivalente di 28 miyon euro den bonus cash y accion na su tres ehecutivo top, maske na comienso di pandemia di coronavirus a reclama miyones bao e schema di sosten NOW.
“Nos a sigui di cerca e debate den sociedad Hulandes den dianan recien, nos ta tuma esaki hopi na serio, y nos ta na altura di e sensitividad di e topico”, Booking.com a skirbi den un declaracion cu NOS a obtene. “Durante e pandemia, nos a haci e miho uso posibel di e opcionnan disponibel pa yuda Booking.com sali di e crisis y mantene empleo, incluyendo depende riba e schema NOW.”
E programa NOW a wordo estableci na inicio di e pandemia di coronavirus pa yuda negoshinan sigui paga salario y retene nan personal. E prome ronda di pago no a inclui un condicion prohibiendo pago di bonus, pero tur ronda subsecuente si tabata inclui e provision.
E decision pa paga back e placa a yega algun dia despues di miembronan di Tweede Kamer a exigi un investigacion riba e gigante di biaha, cu tambe a elimina cantidad di cupo di trabao aña pasa. Parlamentario di VVD, Thierry Aartsen a yama nan ‘vultures’. Otronan tabata kier blokea Booking.com di por ricibi subsidionan of prestamo di gobierno den futuro.
“E pregunta si nos mester paga back e placa di NOW semper tabata riba mesa, pero pa Booking.com tabata algo cu lo considera unabes nos ta den awanan financiero mas stabiel”, e compania a declara ayera.
Booking.com a genera un ganashi di 4.6 biyon euro na 2019.
Siman pasa, minister di Asunto Social, Wouter Koolmees a bisa Parlamento cu tabatin tiki cu gobierno por a haci legalmente pa obliga Booking.com paga e placa back pasobra no a inclui e provision di bonus inmediatamente den e reglanan. El a bisa cu ta mas importante pa mantene un gobierno consistente cu aplica e regla di bonus retroactivamente y sin advertencia.
