Boneiro ta premira durante vakantie di Pasco e cantidad di caso di COVID-19 lo por aumenta

E siman aki Boneiro a haya e noticia menos agradabel cu Hulanda a dicidi cu tur Pais, esey kiermen Boneiro tambe, ta haya codigo oraño pa loke ta trata Conseho di biahe. Hulanda a splica cu no ta Boneiro ta e problema sino situacion di COVID-19 na e Pais mes. Cu codigo oraño Hulanda kier descurasha pasahero pa bin nos isla.

E noticia a sorpresa nos, segun gezaghebber di Boneiro Edison Rijna. Nos sa con comerciante, empresario y trahado den turismo ta pasando den momentonan dificil cu tiki turista biniendo Boneiro. P’esey mes Colegio Ehecutivo a acerca Hulanda pa wak pa Boneiro haya ayudo extra pa sostene tur esunnan cu ta bay tin menos entrada pa motibo di e decision pa bay codigo oraño.

Te cu awe nos tin 4 caso activo di COVID -19 registra aki na Boneiro. Nos sa cu mayoria di e hendenan cu a pega cu e virus a infecta na trabou of na cas. Pa evita e chens di contagio na trabou nos ta conseha tur empresa, oficina y instancia pa laga trahado traha mas tanto posibel na cas, en particular despues di temporada di Pasco. Nos conseho ta pa soru cu en todo caso te cu 18 di januari 2020, trahado traha na cas. Nos ta conseha esaki como cu nos ta tene cuenta cu durante vakantie di Pasco e cantidad di caso di COVID-19 lo por aumenta.

Tin mas medida cu nos mester tuma pa evita cu e casonan ta subi. Nos sa cu delaster tempo habitante di nos isla y turista no ta cumpli tur ora manera mester cu e reglanan cu tin. Ta tene por ehempel fiesta of evento cu baliamento, ta tene fiesta ilegal y na encuentro priva no ta mantene 1,5 mei di distancia. Gezaghebber Edison Rijna a pidi tur establecimento di horeca tur habitante y tur turista pa por fabor tene nan mes na e reglanan cu nos tin.

Hunto cu polis, Directorado di Supervision y Mantencion , nos ta sigui controla awor mas cu antes pa tur hende cumpli cu e reglanan. Momento cu ripara cu tin tenemento di fiesta ilegal of, fiesta cu DJ y muziek duro, nos ta actua mesora. Esey kiermen cu nos por ehempel por cera establecimentonan di horeca cu no ta cumpli, of duna organisado di fiesta ilegal un boet formal.

Mi sa cu nos tur gusta fiesta, balia, etc. etc. Pero nos mester tene cuenta cu nos no por permiti cu ta trece salud di nos mes y di otronan na peliger.

Si a abo no cumpli esey por pone den peliger e salud di bo wela, mama, tata of otro miembro di famia, bo amigo y conosinan. Laga nos mustra cu nos ta care pa otro. y caminda por, laga nos yuda otro den esaki. Si bo mira cu un hende no ta tene su mes na distancia di 1,5 meter, hala e persona aki su atencion.

Tin un otro motibo pakico nos mester sigui cumpli cu e reglanan. y esey ta cu si nos haya un aumento di caso di COVID-19, nos lo mester bin cu medida mucho mas severo cu mas lo afecta nos manera di biba y anda cu otro.

P’esey si bo tin keho, pa leve cu nan por ta, yama 0800 0800 pa traha un cita pa nan test bo. No duda ni tarda den esaki.

Celebra e dianan di fiesta cu bo sernan keri teniendo cuenta cu e reglanan cu ta conta. E Pasco aki lo ta otro pa nos tur. Celebracion di Aña Nobo tambe. Laga nos tur contribui pa 2021 habri nos bon di salo.