Seis organisacion a dicidi pa uni forsa pa intensiva e lucha contra criminalidad organisa na Boneiro. Ministerio Publico BES, Cuerpo Policial Hulanda Caribense, Warda Costa Region Caribense, Koninklijke Marechaussee, Duana y Entidad Publico Boneiro a firma un declaracion di intencion pa cuminsa un asina yama relacion di cooperacion multidisiplinario.

Gezaghebber y alabes e persona cu a bini cu e iniciativa, Edison Rijna, ta papia di un paso importante pa haci Boneiro mas safe. ‘Naturalmente nos ta traha hunto caba relaciona cu cierto incidentenan. Pero un cooperacion structural ta necesario pa realmente forma un moketa contra criminalnan profesionalmente organisa, pa asina  servicionan di investigacion por actua na un manera proactivo tambe. Nos ke haci Boneiro mas inatractivo posibel pa hende y organisacion cu intencion maligno.’

Concretamente e cooperacion ta bira realidad den forma di e asina yama ‘Multidisciplinaire Maritieme Hub Bonaire – MMHB (Punto Central di Conexion Maritimo Multidisiplinario Boneiro). Na Waf Nello Craane lo instala un punto di sosten na beneficio di e servicionan cu ta traha hunto. For di eynan patruya maritimo por tuma luga, pero tambe ehecucion di operacion di ‘search and rescue’ (busca y salba). Banda di espacio pa mara boto, den bisindario directo ta ekipa un oficina tambe. E aspiracion ta pa cuminsa haci uzo di e facilidad aki na luna di augustus di otro aña. Intercambio di informacion tambe ta forma parti di e cooperacion.

‘Nos pensamento no mester ta asina inocente pa kere cu organisacionnan criminal no tin tension pa Boneiro. Pa hopi aña caba mi tin preocupacion relaciona cu señalnan cu mi ta haña cu gremionan robes ta laga nan bista cay riba Boneiro. Mi  preocupacion a keda confirma den e ‘Geïntegreerde risico analyse Caribisch Nederland’ (Analisis di riesgo integra Hulanda Caribense) di ‘Analistennetwerk Nationale Veiligheid’ (Ret di Analista Siguridad Nacional) cu nan a publica na luna di mei aña pasa. Den e documento aki nan ta adverti pa efectonan dañino, por ehempel efectonan cu ta perhudica nos estado di derecho democratico y cu ta destabilisa nos comunidad.’

E actividadnan criminal cu e investigadonan a identifica ta relaciona cu entre otro negoshi y contrabanda di droga, arma y hende, y tambe labamento di placa cu criminalnan a gana cu e actividadnan aki. Un gran parti di esaki ta tuma luga den e ambito maritimo. Cada un di e partidonan cu a firma e declaracion di intencion, durante e ultimo añanan a aumenta nan atencion pa e sector aki. Pero cada un riba su mes a yega na e conclusion cu lo tin mas efectividad si bini mas coherencia den nan acercamento.

Un grupo di proyecto conhunto ta bay procesa e plan mas aleu. ‘Hunto nos a expresa e ambicion pa den e añanan binidero mehora e control di frontera maritimo di Boneiro fuertemente. Influencianan no-desea for di gremionan criminal no tin mag di haña un chens na nos isla. Ciudadanonan, empresarionan i bishitantenan mester por sinti nan mes safe’, segun gezaghebber Rijna