Director di parkenan nacional STINAPA Arjen de Wolff, a bay Den Haag siman pasa pa asina convence parlamentarionan y ministerionan pa yuda nan trata e retonan cu tin encuanto naturalesa riba e isla.
Segun de Wolff, cu accion concreto y lihe riba tereno ambiental, desaroyo teritorial, naturalesa y clima riba Boneiro, por tin hopi ganashi den tiki tempo y cu gastonan relativamente abou.
Boneiro ta depende riba su naturalesa, segun de Wolff, pa cual tin mester di un accion bon defini en contra e menasanan cu naturalesa ta experiencia. Restauracion di naturalesa, specialmente ora ta trata di planta mas mangel, ta sumamente importante pa e isla.
Reunion parlamentario
Diahuebs ultimo tambe a tuma luga un reunion entre miembronan di Tweede Kamer pa asina trata e topico di Boneiro su naturalesa. Miembronan di parlamento Hulandes a haci preguntanan na secretarionan di estado di asuntonan interno, relacionnan di Reino, asuntonan social, asuntonan economico y clima riba diferente topico, incluyendo Boneiro su naturalesa unico pero alabes fragil.
Specialmente mirando e crisis di Sargassum cu ta asotando e isla tabata locual parlamentarionan a trata durante e reunion. Antje Diertens di D66, cu apoyo di otro gruponan politico a pidi gobierno Hulandes pa ofrece STINAPA e recursonan necesario pa asina por maneha e crisis di Sargassum. E crisis aki ta afectando Boneiro su coralnan, naturalesa en general y salud publico, ademas di por tin efectonan negativo pa mercado laboral riba e isla.
