Shalick Clement, vocero di Warda Costa ta considera cu esaki ta poco probabel cu Warda costa di Boneiro a manda un boto cu Venezolanonan ilegal pa Corsou.
Cu esaki el a responde locual e director di Gestion di riesgo y Alivio di desaster, Lesley Fer, a bisa durante e consulta IPKO siman pasa. “ Den e banda di e presentacion esaki tabata skirbi cu letternan cora:
“Notabel: e boto cu Venezolanonan abordo a ser dirigi desde Boneiro pa Corsou”.
Den un splicacion ta bisa: “ Nos ta traha hunto cu e Islanan ABC riba e file aki. Tabata tin un situacion na unda cu un boto Venezolano a bay Boneiro cu personanan cu probablemente tabata indocumenta y cu simplemente a ser manda pa Corsou. Kiermen si e inmigrantenan indocumenta bini Corsou, nos lo procesa nan y deporta nan. Nan ta bay Boneiro y despues nan ta bisa nan no boso mester a bay Corsou corecto? Corsou ta den e direccion ey”. Esaki ta realmente algo notabel. Esaki ta pa e motibo cu mi ta bisando nan, pa motibo cu ciertamente tabata notabel pa mi persona”.
Ora cu un parlamentario Hulandes Nevin Özütok a bin bek riba e punto aki y a bolbe puntra tocante e inmigrantenan indocumenta cu a ser manda desde Boneiro pa Corsou, Fer a ripiti:
“ Ta trata di e caso aki cu e inmigrantenan indocumenta a ser manda desde Boneiro pa Corsou pa Warda Costa y e Warda di frontera eynan. Nan a bay Boneiro y nan a kiboca, pa motibo cu nan kier a bay Corsou y nan a ser dirigi pa Corsou”.
Clement a bolbe ripiti un bes mas: “Warda Costa di Curaçao, Bonaire, Aruba, Sint Maarten, Saba y Sint Eustatius ta uno y e mesun Warda Costa. Mi no por imagina cu tal cos a sosode. Mi lo tin comproba esaki y te cu awo ningun hende por confirma e historia aki”.
