Fundacion Nos Ke Boneiru Bek ta mira bek riba un simposio sumamente exitoso cu a ser tene na Bonaire riba e fechanan di 6, 7 y 8 december. E temanan principal di e conferencia a trata tabata derecho di autodeterminacion y reparacion den Caribe. James Finies, presidente di Fundashon Nos Kier Boneiru Bek a enfatisa cu un di e obhetivonan principal cu a funda NKBB tabata pa re-list, reinscribi Bonaire riba e lista di teritorionan sin propio gobernacion di Nacionnan Uni.
Bonaire tabata escenario di un reunificacion historico caminda representantenan di 9 pais y/o teritorio Caribense cu ta ainda bou di administracion colonial a reuni.
Gobernantenan, lidernan, expertonan, academiconan y activistanan for di Aruba, Corsou, Sint Eustatius, Bonaire, Puerto Rico, San Andres, Providensia, Virgin Islands y Cayenne- Guiana tur cu mesun meta comun pa husticia, desaroyo Iy bienestar pa nan pueblonan a mustra solidaridad na e pueblo Boneriano. Ta nos tur ta den mesun lucha pa recobra, restaura y respeta nos derechonan fundamental humano.
Loke a resalta mas durante e discursonan, presentacionnan y debatenan tabata cu ta mesun modus operandis, e mesun sistema dividi, oprimi y domina tur e colonisadonan ta uza contra e teritorionan y pueblonan cu nan tin bao di nan administracion y dominio.
E conclusionnan mas impactante despues di e sesionnan di e parti academico cu a tuma luga den e sala di conferencia na Capt Dons Habitat y tambe discursonan publico den parke Wilhelmina tabata cu e caminda o ruta pa sigui cana ta, cu un frente-uni direccion di comunidad internacional y Nacionnan Uni. Specialmente pa wordo re-list, re-inscribi riba e lista di teritorionan sin propio gobernacion cu ta cay bao di e Comision di Decolonisacion cu su unico obhetivo ta proteccion di e teritorionan y nan pueblonan aki, conforme articulo 73 di Chapter XI di Nacionnan Uni pa guia, facilita y yuda realisa nan desaroyo, bienestar y propio gobernacion y asina eradica colonialismo den tur su formanan existente den Caribe.
