Wepa mi hendenan, nos ta bibo riba luga. Despues di 11 ora di vuelo y un stop cortico na Boneiro m’a yega Aruba tur entusiasma pa ta bek na cas. Di Aeropuerto stret pa Aruba Summer Music Festival mi ta akinan den mi tristesa paso mi a lanta diadomingo sin Maluma band’i mi. Pero bida ta sigui, pues ban papia. Mucho tiki dia bek pa di berdad ofrece un opinion valido riba con cos ta mustra riba e isla, mi por bisa cu politiconan a bira creativo cu nan jingle nan di campaña si. Kico! Mester core extra atento riba caminda pasobra entre parada y pitamento e ta ferfelo pa yega un caminda sin haya bo mes ta meña un poco den stoel di auto y lubida ta unda mester bay.

Algo si cu a dal mi duro y di biaha ta e prijs di cuminda riba e isla. Dios tata santo, 3.30 florin pa un donut di bright bakery na e CITGO na Palm Beach?

Ta ken por afford biba riba e isla ki mense? Beyoncé? Con boso a haci e ultimo 6 luna nan ki? I mean, December ora mi a bin caba mi tabata un poco spanta pero awo si mi ta cuestiona si mi lo por bin bek e isla. Pasobra ta unda mi ta cuminsa? Mientras politiconan ta pasa di cas pa cas buscando voto, comunidad ta riba Facebook ta haci fundacion pa sobrevivi inconviniencianan di bida.

Curason ta haci dolor, mi ta cansa di wak hende sufri. Cansa di wak mi mama traha tanto. Di amigonan di famia cu tur dia ta bin cas y comparti nan tristesa. Con aña escolar ta den bolter y nan no sa con nan ta bay cumpra cos di scol pa nan yiunan. Fada di mira hende cu ta traha asina duro y ainda tin mucho luna ta resta na final di nan placa. E struggle di pueblo, no por wordo scondi tras di klinker mas no. Bo ta wak y sintie tur caminda. Ami personalmente, a crece den un cas cu tabata refugio pa hopi hende cu tabata pasa malo, te hasta ora nos mes tambe tabata pasa malo.

Mi ta papiando di hopi aña atras, tempo mi tabata tin un 7 of 8 aña. Mi tin memorianan hopi bibo di e tempo ey. Tempo cu 2 florin tabata cumpra un pastechi y un malta pa bay scol. Tempo kipashi tabata 1.85, Tempo e local ainda por a biba riba un salario minimo y e inmigrante tabata esun cu tabata lucha. Mi a crece ta wak hende bende droga, ta wak hende horta, ta conoce muhenan cu tabata prostitui. Mi a crece den un cas unda tur hende tabata yega. Unda memey di desgracia semper nos tabata t’ey pa otro sin husga. Pa mi, wak hende pidi y pidi ora mester pidi no ta algo di otro mundo. Aruba ta pasando den duro ta berdad, pero nos hendenan tin curason grandi. Un ta yuda otro unda cu por, sin pensa dos biaha. E ta dushi pa ta bek na cas.

Pa scucha “Bon Dia” tur caminda bo drenta, pa caheranan na supermarket yama bo “Dushi” sin motibo, pa hende habri un porta pa bo, pa scucha “danki”. Mi a bay Italia y Alemania prome cu mi a bin Aruba, na Italia m’a bay un lama masha chapo y mi amiga a rabia pasobra mi no tabata mustra impresiona. El a bisa mi “Pa bo nada ta bon suficiente”. Mi a bis’e, abo por wordo impresiona cu zilver, pero ami?

Ami tin oro na cas. Mi stima bo Aruba.