Ta nos mes ta haci cu nos ta asina?
Awe parlamento lo tin bishita atrobe di e trio di experto di CAFT, cu ta bin delibera y intercambia di opinion cu Parlamento. Un bon custumber, cu preferiblemente lo mester ta existi riba mas tereno tambe. Ademas, tin hopi cos di papia na e momento aki. Tema principal lo ta naturalmente e ‘state of affairs’ di presupuesto 2016, y prome cu esey, esun suplementario cu no a yega na man di CAFT ainda, si nos informacion ta corecto. Pasobra, segun e ley cu e propio fraccion cu ta apoya gobierno a aproba na augustus ultimo, ta haci cu prome y despues cu e presupuesto suplementario bay parlamento, CAFT mester duna su opinion. Cu consecuencia cu awor no tin nada pa bay Raad van Advies, ni mucho menos yega Parlamento.
Tur dos e proyectonan di ley aki mester ta trata y aproba prome cu fin di aña, y ta bisto cu esey no ta bay sucede. Esey ta un problema? Si bo tende tur e comentarionan cu NO a sali, ta Hulanda y CAFT so ta preocupa cu ta viola constitucion cada aña treciendo e propuesta di ley aki Parlamento den e aña pa cual e ta conta. Ken na Aruba a expresa nan preocupacion, o miho ainda nan indignacion pa e manera di traha aki? Casi ningun persona o instancia, y pakico no? Pasobra nos a custumbra caba cu “ta asina cos ta bay aki, ta e macambanan ey ta haci druk”?
Den tur esey, ken ta responsabel pa e tardanza grandi tur aña den entrega di presupuesto? E forma mas facil pa culpa otro ta pa e mandatario di turno tira e culpa riba e empleadonan publico cu no a haci nan trabao. Sin embargo, e realidad ta cu e problema no ta sinta den e departamentonan. Pa hopi aña caba, departamentonan mester cumpli cu e deadline di fin di januari pa entrega e prome draft di ‘wenselijkheidsbegroting’, y tin un deadline final algun luna despues pa entrega cambio ainda. Mas tanto pa luna di juni, e base pa e presupuesto di e aña siguiente por ta cla, pa cumpli cu e rekisito di entrega Parlamento un presupuesto den forma di proyecto di ley pa 1 di september.
Si no ta e empleadonan publico, ta ken anto ta causa e tardanza? Masha simpel, esnan politicamente responsabel, e ministronan cu no por caba di ‘figure out’ pa nan mes ta kico nan kier. Kico ta e problema mas grandi actualmente? Ministro di Financia a kere cu tabata factibel pa bin cu un cambio drastico di e regimen fiscal via introduccion di un ABB, cu lo tabatin e bentaha cu eyden a bay scondi un aumento fuerte di entrada di impuesto pa gobierno. Claro cu normalmente nos como ciudadano no ta haya sa esey, pero den nan santo inocencia nan a conta CAFT, lubidando cu e organismo si ta publica su trabao pa tur hende lesa. Of nan a haya nan mes obliga di bisa CAFT, cu e mesun consecuencia cu nan ta comunica esaki na tur hende. Na ultimo ora, esun cu carece di conocemento di economia, pero si ta bon administrado di voto, a bin para henter e proceso, pero no ta defini un alternativa viable, ya cu e no kier baha gasto tampoco. E tram a bolbe dal para, pero esun aki no ta costa binti miyon so….
Kico tur esaki ta siña nos? Cu pa casualidad nos ta haya transparencia y bon gobernacion imponi riba nos di afo? Acaso na Hulanda nan tin otro norma den esaki? Y si acaso den cierto situacion nos por desvia di e norma acepta den Reino, den e casonan aki, kico lo ta argumento di e mandatarionan pa tene e ciudadano den scur y no duna di conoce kico ta e rumbo den cual nos ta bay? Kico ta haci nos asina special cu aparentemente nos tin ‘derecho’ di desvia di loke den e era moderno aki ta ser considera normal na otro pais, y sigur na Hulanda y den Union Europeo?
Lamentablemente, na luga cu nos discuti e tema aki ampliamente, a base di e violacion di constitucion cu ta tumando luga bao di nos nanishi, mas cu tur cos nos ta mustra un actitud di “ay no maha, dianan di fiesta ta den porta”. Y ademas, si nan keda cla na februari of maart, nan a mehora caba compara cu aña 2014 y 2015, toch?
Ora nos ta acepta e tipo di actitud y forma di procede aki, nos mes ta aceptando cu reglanan normal di bon gobernacion no ta conta pa nos pais, pasobra nos ta biba y traha bao di condicion special unda esakinan no ta conta. Si tin un mayoria cu ta acepta esaki, anto ‘que sea así’. Pero nos no mester keha anto ora ta considera nos como ciudadano di segunda categoria den Reino, pasobra nos tin nos mes normanan ‘exotico’, nos ‘couleur locale’ cu ta haci cu nos no tin problema pa biba bao di un regimen di mal gobernacion. Ta esey nos kier?
12dec, JM, Editorial
