Bon Gobernacion ta mas… Cu regla riba papel…

Gobierno ta mustrando su bon intencion pa loke ta ‘bon gobernacion’ usando continuamente e variante di idioma Ingles, cu ta haci esaki mas interesante ainda. Manera semper, ‘hay que ver para creer’ y practica bon gobernacion no tin di haci solamente cu e reglanan cu ta pone riba papel, sino cu cambia e manera di atende asunto den e aparato publico. Te awor aki nos no ta mira mucho den documento concreto cu ta accesible pa publico, asina cu tur cos ta keda por lo pronto den e fase di ‘bon intencion’ aki.

Den cierto sentido nos ta comprende si pa nos actual gobernantenan, pasobra for di pasado loke nos a haya tabata unicamente e veredictonan di nos hueznan na diferente nivel, cu a constata mil y un biaha cu si bo no tin regla di ‘good governance’, ley Hulandes keto bay pa mas di un siglo y mey conoce e concepto di ‘deugdelijk openbaar bestuur’ segun cual ta midi actuacion di cualkier mandatario o empleado publico cu mester por conoce pa nan mes kico den un dado situacion ta loke ‘deugdelijk bestuur’ ta exigi di nan. Por ehemplo, nos conoce pa varios decada caba e practica di parti fabor na ultimo momento di gobierno, por ehemplo nombramento, partimento di tereno, etc. Tabatin varios caso asina cu a termina dilanti huez unda mandatario y beneficiado a haya un scual pa nan actuacion: nan mester tabata sa mihor.

Naturalmente no tur hende ta asina. Nos conoce testimonio di un persona cu den pasado a haya yamada un ora antes di clausura di gobernacion di un gobierno di coalicion. Ora el a acudi na despacho di e ministro di e tempo ey, a resulta cu e documentonan pa e haya un tereno cu cas na Sero Colorado tabata cla! Algun tempo promer cu esey en berdad el a pidi un di e casnan cu a bira ruina na Sero Colorado, pa e drecha esaki pa e por tin un cas di su mes. Nunca el a soña cu lo a ofrec’e un cas na oriya di lama, cu awor aki den varios caso a bira vivienda di alto valor. Pero e no a acepta. El a bisa e ministro bon cla cu si e ta desea di pone su propio cara na berguenza, esey ta su asunto, pero e si no a nace y lanta den un famia cu no conoce kico ta drechi y kico ta robez. Por cierto despues varios persona den su alrededor social a hari, haci su bofon y yam’e pa estupido, pasobra el a nenga e regalo di ultimo ora. Pero como persona berdaderamente integro, esey no a molestie.

Pero e Editorial aki no ta pa duna testimonio personal di kico ta ser integro so. E ta pa mustra riba e hecho cu supuestamente nos a cuminza cana e caminda largo di reparacion y reinstitucion di integridad, pero cu esey ta exigi trabao den varios aspecto. Pa loke ta legislacion directamente relaciona cu bon gobernacion, esey cualkier dia nos lo haya pa mira; e no por keda oculta pa semper den oficinanan di gobierno. Te awe nos ta tende anuncio di loke ‘ta bay haci’ pero nada mas. En todo caso, bon o mal formula, esey ta bay ta e instrumentonan directo pa atende e fenomeno di mal gobernacion.

Sin embargo, esey no ta suficiente. Tuma por ehemplo kico ta sucede, o mejor dicho no ta sucede, riba tereno di medio ambiente. Mientras cu nos tin varios problema pa atende cu tin nan aspecto medio-ambiental, no tin, en todo caso no visible, accion pa yega na legislacion adecua. Segun nos informacion tabatin recientemente renobacion di permiso y importacion di un cantidad grandi di UTV nobo, cu keto bay ta core riba gasolin. Mientras di un banda nos tin un ministro cu ta bin ‘bende’ nos e concepto di ‘carbon credits’ ta laga un oportunidad bay pa cuminza berdaderamente limita e uso di vehiculo riba combustible fosil, y cu ademas ta percura pa un boroto inaceptable, cu por a pasa pa pasado usando vehiculo riba electricidad. Nos conoce e reaccion fofo di den gobierno caba: “Si, pero e doñonan no kier, nan no ta cla p’e.” Nos lo bisa: “Y ta ken ta manda den e lugar aki?” Pakico na otro momento si gobernantenan ta mustra cu nan ta bon para den nan sapato, pero ora ta trata e temanan aki, de repente e hueso di lomba ta bira kakiña…

Si nos mester kere nos gobernantenan, na cualkier momento lo cuminza cu actividad industrial riba tereno di refineria. No ta bisa cu tanto palabra cu e refineria no ta bay t’ey mas, pero laga nos supone esey. Loke nos kier bisa aki ta cu e industria ey a opera pa casi un siglo, sin ley ambiental… Pregunta anto: ta riba e mesun pia ey lo ta bay cuminza atrobe, tumando como pretexto cu tin pura y no tin tempo pa traha ley? Tumando como ehemplo e asunto di gas natural, esaki ta mara na Merca na requisito estricto di EPA, y e compania lo bisa esey tambe, pero si nos no percura pa ley local di mesun indole, esey no tin consecuencia algun. Y awor cu ta pensando riba introduccion di hidrogeno, masha bunita, pero igualmente mester regla severo pa e tipo di operacion peligroso aki. E experiencia ta, cu si ningun hende no bisa nada, ta olimpicamente ‘skip’ e legislacion necesario. Pesey, ‘bij deze’ e advertencia aki.