Aruba por a recorda dia 2 di october ultimo na unda cu un Arubiano di nomber Heintje Ras a drenta den e mina di fosfaat, ubica na Sero Colorado, pa asina por cumpli cu su meta di keda 100 dia eynan. Meta di e hazaña ta pa drenta den e Record Mundial Guinness y yuda Aruba pa haya su Mega Museo di Antiguedad.

Ayera diadomingo, reportero di Bon Dia Aruba a baha bao di tera y drenta den e mina di fosfaat pa logra haya un entrevista cu Ras, mirando cu ya caba a pasa 3 siman desde cu el a drenta den e mina y a keda isola. Pa esaki el a indica cu e ta bayendo poco poco. “Tin biaha e dianan ta parce cu no tin final, otro dianan ta bay lihe.” El a indica cu te awor el a surpasa hopi reto.

Tur dia ta mesun dia, segun Ras a indica, caminda e tin cu deal cu e calor, cu temperatura, hopi sodamento, sin conta e parti mental cu ta un factor hopi grandi pa su persona, treciendo dilanti cu esaki no tabata manera el a kere na cuminsamento.

E temperatura na unda Ras ta, segun ekiponan cu e cual a midi, ta entre 43 cu 45 grado. Den caso ey e ta conta cu e ta muha henter su curpa cu awa cu ta cay paden di e luga. E tin un stoel di plastic na unda e ta sinta pa basha awa riba su mes, y asina, “e awa ta bira manera mi airco”, el a afirma.

For di algun dia prome cu Ras drenta den e mina, el a anuncia cu ya caba el a cuminsa cambia su sistema di comemento. E no mag di come cumindanan pisa, ya cu e ta full aparta y isola paden di e mina den un ambiente scur. Pa cu esaki el a bisa cu dianan prome di su entrada, el a acerca algun instancia pa nan por yud’e cu su alimentacion, na unda cu Marinierskazerne ta esun cu ta yuda Ras pa e cuminda di 100 dia.

Ta trata di un cuminda special cu soldadnan ta usa na momento di guera, pa nan sobrevivi. Esaki ta bin den un forma di saco unda e ta haya tur tipo di alimentacion, paki di juice, paki di cuminda, buscuchi, diferente tipo di vitamina pa asina su sistema por wanta tur e dia cu e tin pensa di keda abao. “Door di e sistema di cuminda aki mi ta draai,” el a bisa.

Den dianan aki, manera Ras a menciona caba, a presenta hopi reto y esun di mas pisa tabata e dia cu su yiunan mester a sali. Ras tin dos yiu di nomber Alzachary y Alzachayla, cu a keda hunto cu su tata for di e prome dia cu el a drenta den e mina. Cu su wowo yen di awa Ras a conta cu esey tabata e dia mas dificil, pa motibo cu nan ta un ekipo di tres. E semper ta cu su dos yiu, kendenan a bay compaña y duna apoyo na nan tata y riba e dia cu nan a mester a sali y bay, “esey tabata e reto di mas grandi, despedi di nan”.

Aunke e ta consciente cu su yiunan ta den bon man, cu tin hende y dos ruman di dje cu ta cuida di nan mientras e ta den e mina, e ta pensa riba nan hopi biaha den dia.

For di e momento ey cu su yiunan a sali, el a drenta den otro scenario. El a keda su so, na unda el a sigura cu su mente a cuminsa traha, pa motibo cu e no tabatin ni un hende mas pa papia. “E ora ey e mente a bira un tiki traicionero y mi mester a deal cu esey. Dos biaha den 22 dia m’a hay’e hopi hopi fuerte mes, cu mi tin cu para keto, para duro”, Ras a comenta.

El a trece dilanti cu e hazaña aki ta pa un mision, caminda e tin cu keda 100 dia abao den e mina di fosfaat, unda e ta resa hopi. Esey ta yen’e hopi dia tras dia.

Tocante cierto rumor cu a wordo publica riba rednan social, di personanan cu a drenta den e mina y no a wak Ras, el a contesta cu e ta ubica aproximadamente entre 20 pa 25 minuut for di entrada principal di e mina. Ademas e ta un persona cu ta tour guide pa 9 aña den e luga aki y den e añanan ey, el a bisa cu den e mina a coba pa 15 aña. “Imagina con grandi e luga aki ta, ta logico si bo ta baha aki bao bo no ta bay haya mi lihe. Niun hende sa na unda mi ta”, pues asina e ta considera ilogico e comentario di algun persona.

Den e luga na unda e tin su implementonan pa drumi, come y pasa e dianan, el a bisa cu e ta sinti su mes hopi confortabel; pero esaki a resulta cu ta e luga di mas cayente cu tin den e mina.

Tambe ta conoci cu tin hende cu ta para den oranan di dia y anochi den e porta principal di e mina, pa asina duna Ras apoyo y controla si tur cos ta bayendo bon. Ademas tin dos persona cu el a menciona, cu ta Karina Sevinger cu su ekipo di Aruba Explorers y Mario Perez cu tin ekiponan pa midi e presion di Ras, check e sucu y su salud, cu no a presenta ningun problema den tur e dianan aki.

Dia 9 di januari ta e dia cu Ras ta cumpli 100 dia y e tin plania pa sali, unda cu el a duna e mensahe di danki na tur esunnan cu ta apoy’e den hazaña aki, cu tin e obhetivo pa recauda fondo local y internacionalmente pa asina inverti den un Mega Museo. Algo hopi grandi na unda e por pone miles di articulo den e museo mas grandi den henter Caribe. Ademas di esey e tambe tin un coleccion di 14 auto.

Pa finalisa, Ras a pidi pa pueblo di Aruba pa compronde cu e tin asina hopi articulo cu e kier mustra Aruba, y cu a pesar cu el a bati na porta di diferente instancia grandi, e no a haya su apoyo.

Ta importante pa destaca cu dia 5 di augustus di aña 2010, 33 trahado di un mina na Chile a permanece 69 dia trapa pa via cu e tera a los den e mina. E rescate di nan a tuma luga 13 di october y tabata uno angustiante, cu a wordo transmiti na television Chileno pa motibo cu nan a keda 688 metro bao di tera den e mina San Jose na nort di Chile. E obhetivo di Heintje Ras ta pa surpasa e 69 dia ey y yega na 100.