Diahuebs mainta a tuma luga e reunion solemne den Parlamento di Aruba pa yama bon bini na e di cuater Gobernador pa pais Aruba. A cera e caminda entre 8’or cu 11’or di mainta anto tene e ceremonia oficial pa asina duna un bon bini na Aruba su gobernador nobo.
Varios representante di gremionan den comunidad como tambe parlamentarionan y Gabinete Mike Eman II tabata presente comparabel cu apertura di aña parlamentario. Presente tambe tabata Gobernador saliente Sr. Fredis Refunjol kede ta bisa Bon Dia Aruba: “Esaki ta e parti protocolar manera constitucion ta prescribi den e reglamento di Gobernador. E transicion tabata netjes, el a bay manera cu e mester ta. Manera cu e mes a bisa den su discurso, cada Gobernador ta duna e contenido cu e ta kere
y pone accento na locual e ta kere ta principal. Ta asina si cu semper tin asuntonan cu bo mester tene cuenta cu nan pero e esencia ta cu cada gobernador ta realisa e funcion manera cu e mes ta kere cu e mester ta.”
Su Excelencia Gobernador di Aruba Sr. Alfonso Boekhoudt a presenta su credencianan den Parlamento durante e reunion solemne y asina inicia su funcion como Gobernador. Lo no a scapa e atencion di esnan cu a sigui e proceso di acerca cu tanto na Aruba como na Hulanda tabata tin discusion tocante e nombracion di Gobernador. Durante su prome discurso den funcion como gobernador di Aruba, su Excelencia Gobernador Boekhoudt a subraya : “Mi ta spera cu nos por cera e capitulo aki y habri uno nobo cu vision pa un futuro di colaboracion y positivismo constructivo cu tur entidad y institutonan den nos Democracia parlamentario. Ami ta compromete mi mes 100% pa cu esaki den liña cu e promesa cu mi a haci durante mi huramentacion dilanti di nos Reino.” Gobernador Boekhoudt ta enfatisa den su discurso cu: “Cada un Gobernador ta un otro persona den un otro periodo di tempo. Pero na mes momento e instituto di Gobernador ta un simbolo di continuidad y di union. E ta un coneccion directo di nos pasado estatal y di su historia pa cual te cu awe nos ta sigui traha.”
