Dialuna anochi, bomberonan a confronta un situacion fastioso, caminda nan a sali pa paga un candela den St. Maartenstraat. Na yegada di e departamento a ricibi tiramento di piedra, boter, y klinker di e habitantenan, cu a causa daño na un truck.
Ferdinand Ponson di cuerpo di bombero a expresa cu ta lamenta e suceso, cu ‘tin mixed feelings’, pe motibo cu pueblo, e ‘muchanan di bario’, mester compronde cu nan t’ey pa cuida nan y pa tene cuenta cu comunidad.
Ponson a agrega cu tin dos dienst cu ta den linea frontal, cual ta polis y bombero. Nan a presenta na e sitio pa asina tene pueblo safe, pero a confronta cu otro situacion. E ta bisa cu di un banda, nan ta trankilo cu ta daño material so a sufri, ‘y no e personal mes di brandweer’.
“Nos ta gradici cu Señor, pasobra por a bay mas malo. Nos tin cu tene na cuenta cu material cu nos tin, anto cuida esaki hopi, pa motibo cu no ta material barata. E cuido ta extra, pa otro personanan comete e actonan aki…” el a expresa.
Brandweer ta pidi pueblo pa tene bon cuenta, y no bin cu actonan asina contra polis of brandweer, cu ta trahando pa siguridad di pueblo. Ya cu tin toque de queda, hende mester keda cas. Mester tene cuenta cu esunnan na frente di e situacion riba caya, kendenan t’ey pa yuda y cuida pueblo.
Tambe ta pidi pa comunidad haci nan parti y no hinca cuerpo policial of bombero den peliger. Ponson ta menciona cu nan no ta compronde kico hende kier demostra cu candela.
Polis ta bezig cu analisis pa purba di compronde e motibo. Tambe ta bayendo na cierto parti di Aruba pa papia cu habitantenan di bario pa saca e informacion. Ponson ta agrega cu pa cende candela na un luga, esunnan responsabel mester tene na cuenta cu por tin hendenan grandi, muchanan chikito, y cu ta pone nan den riesgo.
E ta bisa cu e huma por yega tur caminda, y despues di toque de queda tin hende tin cu sali for di nan cas pasobra e huma ta afecta nan. Pues ta pidi tur hende, pa no cende candela, e ta algo contra ley, ta kibra regla, y ‘ta trece peliger’.
“Nos ta bringando pa e situacion aki keda mas cortico posibel y nos por bay bek den normalidad. Pero pa esaki sucede mester yuda otro. Pues nos peticion ta pa no cende candela, no kima sushi. Mantene bo mes na regla pa nos por pasa e temporada aki”, el a declara.
Pa locual ta e condicion di e truck, Ponson ta splica cu nan ta cuida nan ekipo masha hopi pa evita cualkier daño, pa asina tin ekipo pa sigui brinda nan servicio. Lo mester check cu departamento pa bestel un windshield pa asina cambia esaki, mirando cu ta un windshield no comun sino style di bol di tur banda, ‘e mester ta lihe y no ta algo cu ta barata’.
