Bomberonan specialista a salba e ultimo specimen salvahe di un mata prehistorico den mundo for di e candelanan cu a devasta boskenan west di Sydney, oficialnan a bisa ayera.
Bomberonan a baha for di helicopter pa alcansa e grupo di menos di 200 Wollemi Pines den un ‘gorge’ remoto den Blue Mountains un siman prome cu un candela forestal enorme a alcansa e luga, segun director di servicio nacional di parke y bida salvahe, David Crust, a bisa.
E bomberonan a pone un sistema di irigacion pa tene e asina-yama mata dinosaurio muha y a pomp awa diariamente for di e ‘gorge’ mientras e candela cu a kima fuera di control pa mas di dos luna tabata acerca.
Avion di bombero strategicamente a bom e parti frontal di e candela cu retardante di candela pa slow su progreso, cual a yuda pa baha intensidad di e candela.
“Wollemi Pine ta un especie particularmente importante y e hecho cu aki ta e unico luga den mundo unda nan ta existi den cantidad chikito ta hopi significativo”, segun Crust.
Minister di Medio Ambiente di New South Wales, Matt Kean a bisa cu e operacion a salba e grupo, maske algun mata a ricibi kemadura.
Wollemi Pine anteriormente a ser mira unicamente den su forma fosilisa y tabata kere cu tabata extinto te ora a hay’e na 1994. E ubicacion exacto di e grupo di mata ta keda un secreto bon warda pa yuda autoridadnan protege e matanan.
A logra controla e candela cu a menasa e matanan e siman aki despues di destrui mas di 510mil hectar. E candela tambe a destrui 90% di e 5mil hectar di Wollemi National Park, unda e matanan aki ta crece, segun Crust.
