E terorista a para entre e multitud di hende bailando, unda centenares di mucha y adulto tabata celebra un casamento, bahando tension di e situacion di guera na Kabul. E terorista a detona un explosion matando decenas di hende.
Te ainda ta conta un total di 63 morto y 182 herida, sobrevivientenan ta esunnan cu ta carga e curpa di nan famia. Mohammad Aslim a bisa cu e, cu su amigo, ya a dera 16 curpa, famia di dje, incluyendo un mucha di 7 aña.
Aslim ta mustra cansa y a bisa cu ta spera di dera mas. Un otro hende homber, Amanullah, a perde su yiu di 14 aña. E ta splica cu explosion a destrosa e cara di e mucha, lag’e sin por reconoce. “Mi ta desea haya pida di e curpa di mi yiu pa asina mi pon’e den tumba”, Amanullah a grita.
E explosion a tuma luga na Kabul. Un casamento unda cu tabata tin mas di 1.200 persona invita. Hussain Ali, doño di e luga di evento, a bisa cu su trahado ainda ta haya pida di curpa, e salon a keda destrosa, yena cu glas, mueble y sapato di e victima.
Sobreviviente a bisa cu e momento tabatin panico, hende tabata grita y lucha pa haya nan sernan keri. “Mi tabata den otro camber ora cu nos a tende explosion y despues nos no por a haya otro ningun hende”, Ahmad Omid a bisa.
“Nos kier pa gobierno stop di discuti tocante poder y pa cuminsa actua manera ser humano, pa trece paz na e pais”, Hajji Reza a bisa, kende ta trahado den e salon.
“Acto asina ta condenabel, un acto di extremo depravacion”, Embahador di Merca, John Bass a bisa. E explosion a tuma luga prome cu celebracion di Dia di Independencia di Afganistan dialuna. A pospone un evento cu tabata planea na Kabul, segun oficina di e President.
Persona di Afganistan tin miedo cu atake na e pais continua y nan a aumenta nan suplica pa paz. President Ashraf Ghani a declara un dia di luto y a bisa cu atake ta inhumano.
