Dia 22 di november ultimo, Departamento di Mucha y Hoben (DMH) a brinda un workshop di Codigo di Proteccion di 3 ora na Hyatt Airport, cu un grupo meta sumamente importante y relevante cu ta traha tambe cu y pa mucha na Aruba.
Di sumo importancia cu nos boluntarionan como profesionalnan ta consciente di e riesgonan di maltrato di mucha y e posibel señalnan cu ta existi y con nan por haci uso di e Toolkit di Codigo y Codigo di Proteccion mes, pa proteha nos muchanan den tur contexto riba area social recreativo.
E anochi aki no tabata posibel sin sosten di Union Europeo su proyecto: #ACT4ECC, cu ta netamente pa conscientisa henter un comunidad tocante desaroyo di capacidad y pa stop cu abuso di mucha na un manera structural y duradero.
Durante e anochi aki por a conta cu presencia di diferente boluntario, pero tambe profesional cu ta labora den e area social y recreativo, manera; Rotaract – Parlamento Hubenil – Cruz Cora – IBiSA – Aruba Sport Unie – Aquatics Federation – Arubaanse Voetbalbond – Aruba Schietbond – Aruba Taekwondo Bond – Aruba Tang Soo Do Federation – Aruba Volleyball Association – Club di Dam Arowak – Aruba Athletic Federation – Heart Center Leadership – Aruba Triatlon Association – ATHA – SV La Fama – Biblioteca Nacional Aruba – Peniel Baptist Church – Evangelical Church of San Nicolas – Good Samaritan CC – Iglesia Pentecostal – Cas di Oracion – Iglesia Catolico – Iglesia Avivamiento – Celebrations Church – DAS – UNHCR – HIAS – Scouting Aruba y mas.
Na final di a anochi e evaluacion a indica cu mayoria di e clubnan ta hopi interesa pa haya mas informacion y tambe guia con pa anda cu e casonan di sospecho di abuso di mucha cu nan ta encontra den nan orarionan. E compromiso sigur t’ey y awor DMH ta bay inicia e trayecto di implementacion di Codigo di Proteccion cerca e organisacionnan aki, cu ya a traha cita caba pa 2024.
DMH kier gradici un y tur cu tabata presente e anochi aki y cu a aporta cu nan pensamento- y ideanan kico ta e siguiente pasonan concreto den proteccion di mucha. No tin duda, cu cada un di boso ta di gran balor, na momento cu nos ta papia di proteccion di mucha y a pesar cu boso ta wak nan un rato so den siman, boso ta hopi biaha ta nan ‘safe haven’ y nos mester ta ekipa pa brinda nan e ayudo y apoyo cu nan ta pidi p’e.
DMH kier enfatisa y encurasha cada un di nos, cu nos no ta unda nos mester ta ainda, pero ta tuma henter un comunidad pa tin e disposicion y boluntad propio, pa realmente traha na bienestar general y proteccion di nos muchanan. Paso no tin duda cu ta tuma henter un comunidad pa lanta un mucha.
