Un polemica nobo ta gira alrededor di presidente Evo Morales, tocante e eleccionnan presidencial cu lo desaroya e luna di october proximo na Bolivia. Memey di e candidatura polemico, e Tribunal Supremo Electoral a remiti diamars pasa, pa un hues electoral, un informe riba un ‘posibel falta’ di e hefe di Estado, den un acto publico unda el a garantisa obranan a cambio di voto.
E organo electoral a indica den un comunicado cu e informe tecnico cu e Comision di Analisis di e entidad ey a traha, a ser manda pa un hues electoral pa su investigacion.
Siman pasa e diputado opositor Wilson Santamaría y Rafael Quispe a presenta un denuncia den e organo electoral contra Morales, kende nan ta acusa di a priminti den un acto na localidad di Morochata cu lo realisa obranan publico si nan garantisa p’e e shen porciento di e votacion.
E informa a identifica un ‘vulneracion posibel’ di e ley di Regimen Electoral, cu ta defini e periodo di propaganda electoral como nobenta dia prome cu e eleccion, cu lo celebra e proximo dia 20 di october.
Tambe e articulo 119 di e ley ta prohibi propaganda electoral den acto publico, ‘cu ta implica e ofrecemento di placa of un beneficio di cualkier naturalesa’.
E informe ta conclui cu e candidato di Movemento al Socialismo, Evo Morales, ‘a comete posibel falta electoral’ door no cumpli cu e articulo 116 y 119 di e norma ey.
E articulo 120 di e norma ta establece cu kibramento di e norma ‘lo duna luga pa impone sancion y multa pa e organisacion politico, e candidato cu a comete e falta, of e medio di comunicacion’.
