Na januari di e aña aki, Evo Morales a genera un polemica fuerte ora el a sigura cu den e caso cu e regresa pa presidencia di Bolivia, e lo organisa “milicia arma”, estilo Venezuela.
Aunke el a rectifica despues, Raúl García Linera, ruman homber di ex vice-presidente Boliviano, Álvaro García Linera, a admiti cu durante e gestion di Evo, Movemento al Socialismo (MAS) a purba di duna movementonan social formacion militar.
“A purba di haci formacion militar di movementonan social. Pero cu hopi iresponsabilidad, esunnan cu a participa a saca potretnan y a haci denuncianan di paramilitarismo, antidemocrata y tin cu para e actividadnan” Garcia a manifesta durante un entrevista pa un website Argentino.
Segun e corant Boliviano Página Siete, Raúl García Linera durante gobierno di MAS nan a haci tareanan di inteligencia y agitacion.
E declaracionnan aki ta pone di manifiesto e intencionnan di e ex-presidente Boliviano pa stimula e estilo cu a wordo implementa pa dictadura Venezolano a traves di colectivonan chavista.
“Si mi lo bolbe, tin cu organisa como Venezuela, milicia arma di pueblo”, Evo Morales a sigura durante un encuentro cu su siguidonan di MAS na Buenos Aires, e prome dianan di aña aki. E audio di e declaracion polemico a wordo publica pa e radio Kawsachun Coca del Chapare, cu ta trasnmiti su actividadnan na Argentina.
Den su palabranan, e ex-mandatario a referi pa Milicia Bolivariano, un di e gruponan arma y di forsa di choke di e dictadura Venezolano. Maduro ta utilisa nan pa vigila edificionan publico, garantisa control di prijsnan y racionamiento di productonan na supermercado, asina como tambe vigila e entrega di cahanan di alimento.
