E informe final di Organisacion di Estadonan Americano (OEA) ta hustifica anulacion di e eleccion teni dia 20 di october pasa, y inicia un proceso electoral nobo na Bolivia, asina presidente interino Jeanine Añez a argumenta diaranson pasa riba su cuenta di Twitter.
Jeanine Añez a mustra na e red social un potret di e embahador di su pais na OEA, Jaime Aparicio Otero, ricibiendo e informe den representacion di Bolivia.
Di su parti, ex-presidente Boliviano Jorge “Tuto” Quiroga, “delegado special” di Bolivia cerca comunidad internacional, a califica di “devastador” e informe final, cu el a considera tambe “historico”, encuanto un “colosal fraude” electoral, di cual el a culpa Evo Morales.
“E tirania a caba y nos democracia awor ta resucita,” el a expresa riba e red social.
E analisis di OEA a confirma cu tabatin “operacionnan fraudulento” den eleccion di 20 di october, cu a altera “voluntad expresa na urna”.
“E manipulacion y iregularidadnan señala no ta permiti tin certeza encuanto e margen di victoria di e candidato (Evo) Morales riba e candidato (Carlos) Mesa,” e informe final ta bisa.
Morales na prome momento a keda proclama vencedor cu margen di 10,57% di voto riba Mesa, cu solamente 0,57 punto di porciento di diferencia pa evita un segundo vuelta entre nan.
OEA a emiti un informe preliminar dia 10 di november den cual a señala iregularidad grave. Despues Morales a anuncia repiticion di eleccion y algun ora despues a anuncia su renuncia, denunciando un golpe di estado.
Añez a asumi poder dos dia despues cu e compromiso di ta interino te ora tene eleccion nobo. Tabata pensa riba inicio di 2020 pa esey, pero Añez no lo ta candidato, asina ministro interino di presidencia, Yerko Nuñez, a declara ayera.
